စစ်ကိုင်းတိုင်း၊ မြင်းမူမြို့ပေါ်၌ ဘုန်းကြီးကျောင်းဝင်းအတွင်း အရက်သောက်နေသော စစ်ကောင်စီတပ်ဖွဲ့ဝင်များအား လက်ပစ်ဗုံးဖြင့် ပစ်ခတ်တိုက်ခိုက်ခဲ့ရာ လေးဦးသေဆုံးကြောင်း ZERO ပြောက်ကျားတပ်ဖွဲ့ (မြင်းခြံ)ခေါင်းဆောင် ကိုသက်ကြီးက ပြောသည်။
ယနေ့ (နိုဝင်ဘာလ ၁၈ ရက်) ည ၇ နာရီ ၁၀မိနစ်ခန့်က မြင်းမူမြို့၊ လေသာဘုန်းကြီးကျောင်းဝင်းအတွင်း ညာဘက်ထောင့်တွင် ထိုင်ပြီး အရက်သောက်နေသည့် စစ်ကောင်စီတပ်သား ခြောက်ဦးကို Zero ပြောက်ကျားတပ်ဖွဲ့နှင့် True Fighter အဖွဲ့တို့ပူးပေါင်းကာ လက်ပစ်ဗုံးဖြင့်ပစ်ခတ်တိုက်ခိုက်ခဲ့သည်။
ထိုသို့တိုက်ခိုက်မှုကြောင့် စစ်ကောင်စီတပ်ဖွဲ့ဝင် လေးဦးသေဆုံးပြီး နှစ်ဦးဒဏ်ရာရရှိသွားကြောင်း ZERO ပြောက်ကျားတပ်ဖွဲ့ (မြင်းခြံ) ခေါင်းဆောင် ကိုသက်ကြီးက ပြောသည်။
“လက်ပစ်ဗုံးတစ်လုံးတည်း ပစ်တာပါ။ ပြင်းပါတယ်။ အော်ရဂျင်နယ်ဗုံးတွေပါ။ မင်းဂွတ်သီးလို့လည်းခေါ်တယ်။ တစ်လုံးဆိုသေတယ်ငါးကောင်လောက်ကတော့။”ဟု ZERO ပြောက်ကျားတပ်ဖွဲ့ (မြင်းခြံ) ခေါင်းဆောင် ကိုသက်ကြီးက ပြောသည်။
မြင်းမူမြို့ပေါ်တွင် စစ်ကောင်စီဘက်က ရမ်းသမ်း၍ ပြန်လည်ပစ်ခတ်သံများ ကြားခဲ့ရကြောင်း ဒေသခံအချို့က ပြောသည်။
စစ်အုပ်စုဘက်က ထိခိုက်သေဆုံးမှုကို ထပ်မံအတည်ပြုနိုင်ခြင်း မရှိသေးပေ။
အဆိုပါ စစ်ဆင်ရေးအား ZERO ပြောက်ကျားတပ်ဖွဲ့ (မြင်းခြံ)၊တပ်ရင်း(၇)မြင်းခြံခရိုင်နှင့် True Fighter တပ်ခွဲ (၃)တို့က ပူးပေါင်းတိုက်ခိုက်ခဲ့ကြောင်း အသိပေးထားသည်။
နိုဝင်ဘာ၁၆ရက်နံနက်ပိုင်းကလည်း မြင်းမူမြို့နယ်၊ဝါစက်ဝင်း၌ ကင်ပုန်းဝပ်နေသည့် စစ်အုပ်စုကို လက်ပစ်ဗုံးဖြင့် ပစ်ခတ်တိုက်ခိုက်ခဲ့ရာ ထိခိုက်သေဆုံးမှုများရှိခဲ့သည်။
