နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ချုပ်နှောင်ထားရာ နေပြည်တော်ထောင်ဟာ အင်းစိန်ထောင်ထက် အခြေအနေ တွေ ပိုဆိုးရွားတယ်လို့ မကြာခင်ရက်ပိုင်းက စစ်ကောင်စီက လွှတ်ပေးလိုက်တဲ့ စီးပွားရေးအကြံပေး ရှောင်တာနယ်လ်က ပြောလိုက်ပါတယ်။
ဒေါ်အောင်ဆန်းစုကြည်ရဲ့စီးပွားရေးအကြံပေး သြစတြေးလျနိုင်ငံသား စီးပွားရေးပါမောက္ခ ရှောင်တာနယ်လ်ကိုဖမ်းဆီးပြီး အင်းစိန်ထောင်နဲ့ နေပြည်တော်ထောင်တွေမှာ ထားခဲ့တာပါ။
ထောင်ကနေ လွတ်မြောက်လာပြီးနောက် သြစတြေးနိုင်ငံကို ရောက်တဲ့အခါ ရှောင်တာနယ်လ်က ထောင်တွင်းဖြတ်သန်းခဲ့ရပုံတွေကို The Australian သတင်းဌာန ကိုပြောပြခဲ့ပါတယ်။
နေပြည်တော်အချုပ်ထောင်ကို သောက်စားမူးယစ်နေတဲ့ ထောင်အာဏာပိုင်တွေ မင်းမူထားတယ်လို့ ရှောင်တာနယ်လ်က ပြောပါတယ်။
“မယုံနိုင်လောက်အောင်ပဲ နေပြည်တော်ထောင်က အင်းစိန်ထက်ပိုဆိုးနေတယ်” လို့ ရှောင်တာနယ်လ်ကဆိုပါတယ်။
ပိုးဟပ်တွေ ၊ခြင်တွေဟာ အများအပြားရှိနေပြီး နွေရာသီမှာအလွန်ပူပြင်းကာ မိုးရာသီမှာတော့ ခေါင်းမိုးကနေ မိုးတွေယိုပြီး အခန်းထဲကို စီးကျလာလို့ စောင်တွေ ၊ ခေါင်းအုံးတွေနဲ့အဝတ်အစားတွေကို ရေမစိုအောင် ပိုက်ပြီးကိုင်ထားရကြောင်း ရှောင်တာနယ်လ်က နေပြည်တော်အချုပ်ထောင်ရဲ့အခြေအနေကိုပြောပါတယ်။
ထောင်ဝန်းထဲမှာရှိတဲ့ဒေါ်အောင်ဆန်းစုကြည်ကိုတော့ အချုပ်ထောင် တရားရုံးမှာ ရုံးထုတ်တဲ့အခါ ရှောင်တာနယ်လ်က မြင်တွေ့ခွင့်ရပါတယ်။
ခက်ခဲဆိုးရွားတဲ့အခြေအနေတွေကြားထဲမှာတောင် ဒေါ်အောင်ဆန်းစုကြည် ရဲ့သွင်ပြင်ဟာ အံသြ ဖွယ်ရာ ရှိနေတယ် ရှောင်တာနယ်လ်က ပြောပါတယ်။
စစ်ကောင်စီဟာ ဒေါ်အောင်ဆန်းစုကြည်ကို နေပြည်တော်အချုပ်ထောင်ဝန်းထဲမှာ သီးသန့်ထားရှိကြောင်း ပြောဆိုထားပါတယ်။
