အမျိုးသမီးသတင်းထောက်ကို ဆူပူအောင်လှုံဆော်မှုနဲ့ ထောင် ၂ နှစ်ချ

ဖမ်းဆီးထားတဲ့အမျိုးသမီးသတင်းထောက် မအလှလေးသူဇာကို နိုင်ငံဆူပူအောင်လှုံဆော်မှု ရာဇသတ်ကြီးပုဒ်မ ၅၀၅ (က) နဲ့ စစ်ကောင်စီက ဒီနေ့မှာထောင်ချလိုက်ပါတယ်။

မအလှလေးသူဇာကို အလုပ်ကြမ်းနဲ့ ထောင်ဒဏ် ၂ နှစ် ချလိုက်တာလို့ စုံစမ်းသိရပါတယ်။

မအလှလေးသူဇာဟာ စစ်အာဏာသိမ်းပြီး ၈ လအကြာ ရန်ကုန်မြို့မှာ ဖမ်းဆီးခံရတာပါ။

အဲဒီနောက် ဒဂုံမြို့သစ်အရှေ့ပိုင်းရဲစခန်းက တရားစွဲတင်ပါတယ်။ ဖမ်းခံရပြီး ၁ နှစ်ကျော်လာချိန်မှာ အင်စိန်ထောင်တွင်းတရားရုံးက ထောင်ချလိုက်တာပါ။

ထောင်ချရာမှာ ချုပ်ရက်ခံစားခွင့်ပေးတယ်လို့သိရပါတယ်။

စစ်ကောင်စီဟာ ပြီးခဲ့တဲ့ နိုဝင်ဘာလ ၁၇ ရက်က ထောင်နဲ့ချီတဲ့ အကျဉ်းသားတွေကို လွှတ်ပေးရာမှာ သတင်းမီဒီယာသမား ၆ ဦးသာပါဝင်ခဲ့ပါတယ်။

အဲဒီထဲမှာပါဝင်တဲ့ သတင်းမီဒီယာသမားတွေအနက် ဂျပန်နိုင်ငံသားကလွဲရင်ကျန်တဲ့သူတွေဟာ ချထားတဲ့ ထောင်ဒဏ် နှစ်စေ့လုနီးပါး ထောင်ထဲမှာ နေခဲ့ရသူတွေဖြစ်ပါတယ်။

စစ်တပ်အာဏာသိမ်းပြီး ၂၁ လကျော်ကာလအတွင်း သတင်းဌာန ၁၃ ခု ပိတ်သိမ်းခံရပြီး သတင်းသမား ၁၀၀ ကျော် ဖမ်းဆီးစစ်ဆေးခံခဲ့ရပါတယ်။

ဖမ်းဆီးခံရသူတွေထဲက စစ်ကြောရေးမှာ ၃ ဦး သေဆုံးထားပါတယ်။ လက်ရှိအချိန်ထိတော့ သတင်းသမား ၅၀ နီးပါး အကျဉ်းထောင်တွေထဲမှာ ဖမ်းဆီးခံထားရဆဲဖြစ်ပါတယ်။