စစ်ကိုင်းတိုင်း၊ ဆားလင်းကြီးမြို့နယ်တွင် စစ်ကောင်စီတပ်က လက်နက်ကြီး၊ငယ်များ ပစ်ခတ်ပြီး စစ်ကြောင်းထိုးလာ၍ ကျေးရွာအများအပြားမှ ဒေသခံပြည်သူများ ထွက်ပြေးတိမ်းရှောင်ခဲ့ရသည်။
ယနေ့(နိုဝင်ဘာ ၂၂ရက်)နံနက်ပိုင်းက မုံရွာ အနောက် မြောက်တိုင်းစစ်ဌာနချုပ်မှ စစ်ကောင်စီတပ်နှင့် ဆားလင်းကြီးမြို့နယ် ရဲတပ်ရင်း (၂၈)မှ ရဲများသည် အင်အားအများအပြားဖြင့် ရွှေတောင်ဦးကုန်းမှ မုံရွာ-ပုသိမ်လမ်းအတိုင်း မြောက်မှတောင်သို့ စစ်ကြောင်းထိုးလာခဲ့သည်။
အဆိုပါ စစ်ကြောင်းသည် မြောက်ယမားတံတားတောင်ဘက် လမ်းတစ်လျှောက် လမ်းဘေးဝဲယာ ကျေးရွာများသို့ လက်နက်ကြီး၊လက်နက်ငယ်များဖြင့် ရမ်းသမ်းပစ်ခတ်ခဲ့၍ ဒေသခံပြည်သူများ ထွက်ပြေးတိမ်းရှောင်ခဲ့ရကြောင်း Revolution Youth Group အဖွဲ့က ဖော်ပြသည်။
ဝမ်ပေါင်ကုမ္ပဏီတွင် လုံခြုံရေးယူထားသောရဲများလည်း ဝမ်ပေါင်လမ်းဆုံမှ မြောက်ယမားတံတားထိပ်ထိ ကင်းပုန်းများချ နေရာယူထားပြီး ကုမ္ပဏီမှ ကြေးများသယ်ယူမည်ဟု သိရကြောင်း Revolution Youth Group အဖွဲ့က ဆိုသည်။
နောက်ဆက်တွဲအခြေအနေအား ဆက်လက်စုံစမ်းနေပြီး ထပ်မံသတင်းရရှိခြင်း မရှိသေးပါ။
ဆားလင်းကြီးမြို့နယ်၊ ဝမ်ပေါင်ကုမ္ပဏီဝန်းကျင်ရှိ ကျေးရွာများအား စစ်ကောင်စီတပ်က မီးရှို့ဖျက်ဆီးခြင်း၊ ဖမ်းဆီးသတ်ဖြတ်ခြင်းများ မကြာခဏ ပြုလုပ် ခဲ့ဖူးသည်။
