စစ်ကိုင်းတိုင်း၊ မုံရွာ – မန္တလေးလမ်းမကြီးပေါ် မုံရွာ-ချောင်းဦးလမ်းပိုင်းအား ယနေ့ည၈နာရီမှစတင်၍ ဖြတ်သန်းခွင့် ယာယီပိတ်ထားလိုက်ကြောင်း မုံရွာမြို့နယ်တောင်ပိုင်း ပြည်သူ့ကာကွယ်ရေးတပ်ဖွဲ့ PDF – South Monywaက သတိပေးကြေညာသည်။
မုံရွာ – ချောင်းဦးလမ်းပိုင်းတွင် စစ်ကောင်စီတပ် များနှင့် ပျူစောထီးများခြေရှုပ်နေပြီး PDF – South Monywa အပါအဝင် အခြားနယ်မြေခံ တော်လှန်ရေးအင်အားစုများနှင့် ထိတွေ့ရင်ဆိုင်မှု ပြင်းထန်နေကာ ထိပ်တိုက်တွေ့ ပစ်ခတ်မှုများရှိခဲ့ကြောင်း၊ထို့ကြောင့် မုံရွာ – မန္တလေးလမ်းမကြီး၏ မုံရွာ – ချောင်းဦးလမ်းပိုင်းအားယနေ့(နိုဝင်ဘာ၂၃ ရက်) ည ၈နာရီမှစ၍ အသုံးမပြုရန် တားမြစ်လိုက်ကြောင်း PDF – South Monywaက ပြောသည်။
“နှစ်ဖက်အပြန်အလှန်ပစ်ခတ်နေခြင်းကြောင့် ပြည်သူတွေမထိခိုက်ရလေအောင် ယနေ့ညကစပြီး မည်သည့်ယာဥ်မဆို ဖြတ်သန်းသွားလာခွင့်ပြုမှာမဟုတ်ပါဘူး။ ဖြတ်သန်းသွားလာတဲ့ မည်သည့်ယာဥ်ကိုမဆို စခယာဥ် အကူလာတဲ့ယာဥ် စခ များနဲ့ ပတ်သတ်တဲ့ယာဥ်လို့ သတ်မှတ်ပြီး ပစ်ခတ်တိုက်ခိုက်သွားမယ်လို့ သတိပေးလိုပါတယ် “ဟု PDF – South Monywaတာဝန်ခံ Daung Karyan က ပြောသည်။
လိုက်နာခြင်းမရှိ ဖြစ်သန်းသွားလာပါကဖြတ်သန်းသွားလာသူများ၏ လုံခြုံရေးကို အာမမခံနိုင်ဘဲ ထိခိုက်မှုတစုံတရာဖြစ်လာပါက တာဝန်ယူပေးမည်မဟုတ်ကြောင်း PDF – South Monywaက အဖွဲ့က ပြောသည်။
တိုက်ပွဲဖြစ်ပွားသည့်အခြေအနေကိုမူ PDFအဖွဲ့များက သတင်းထုတ်ပြန်ခြင်း မရှိသေးပေ။
