စစ်ကိုင်းတိုင်း၊ ဝက်လက်မြို့နယ်ရှိ မူးကြီးကျေးရွာအား စစ်ကောင်စီတပ်၏ မီးရှို့ဖျက်ဆီးမှုကြောင့် နေအိမ်၁၅၀ ခန့် မီးလောင်ပျက်စီးခဲ့ပြီး အဘွားအိုတစ်ဦး မီးလောင်သေဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။
ယမန်နေ့(နိုဝင်ဘာ၂၄ ရက်) မွန်းလွဲ ၁နာရီဝန်းကျင်က ဝက်လက်မြို့နယ်၊ မူးကြီးရွာကို စစ်ကောင်စီတပ်က ဝင်ရောက်ဖျက်ဆီးမီးရှို့ခဲ့ကြောင်း၊ အဆိုပါစစ်ကောင်စီတပ်သည် မီးရှို့ဖျက်ဆီးပြီးနောက် ညနေ ၅နာရီခန့်တွင် ဝက်လက်မြို့ပေါ်သို့ ပြန်သွားခဲ့ကြောင်း ဒေသခံများက ပြောသည်။
မူးကြီးကျေးရွာသည် နေအိမ် ၄၀၀ ဝန်းကျင်ရှိပြီး ခန့်မှန်းခြေ နေအိမ် ၁၅၀ခန့်မီးရှို့ဖျက်ဆီးခံခဲ့ရကြောင်း၊ အဘွားအိုတစ်ဦးမှာ ထွက်မပြေးနိုင်၍ မီးလောင်သေဆုံးခဲ့ရကြောင်း ဒေသခံများက ပြောသည်။
“အိမ်ကြီးအိမ်ကောင်းတွေရော တော်တော်များပါတယ်။ အဖွားအိုတစ်ယောက် မီးထဲပါသွားပြီး။ အဘိုးအိုကြီးတစ်ယောက်ကတော့ ကာကွယ်ရေးအဖွဲ့က ရဲဘော်တစ်ဦးက ကယ်ဆယ်ခဲ့ပါတယ်။ ကျွဲ ၊ နွားတွေလည်း မီးထဲပါသွားပါတယ်။”ဟု GZ Special Task Force – Wetlet အဖွဲ့က ပြောသည်။
စစ်ကောင်စီတပ်သည် ဝက်လက်မြို့နယ်အတွင်း စစ်ကြောင်းထိုးဖျက်ဆီးမှုများ ပြုလုပ်နေပြီး နိုဝင်ဘာ ၁၃ ရက်ကလည်း ထန်းကြီးကျေးရွာကို ဝင်ရောက်ဖျက်ဆီးမီးရှို့ခဲ့၍ နေအိမ်ပေါင်း ၃၀၀ ကျော် ပျက်စီးဆုံးရှုံးခဲ့သည်။
