စစ်ကိုင်းတိုင်း ကျွန်းလှမြို့နယ် ခဝါသည်ကျေးရွာကို စစ်ကောင်စီတပ်က နိုဝင်ဘာ ၂၁ရက်တွင် မီးရှို့ခဲ့ရာ ရွာလုံးကျွတ်နီးပါး မီးလောင်ပျက်စီးခဲ့၍ ဒေသခံပြည်သူများအရေးပေါ် အကူအညီ လိုအပ်လျက်ရှိသည်ဟု ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က အသိပေးထားသည်။
![(ခဝါသည်ကျေးရွာကို စစ်ကောင်စီတပ်က နိုဝင်ဘာ ၂၁ရက်တွင် မီးရှို့ဖျက်ဆီးပြီးနောက် တွေ့ရစဥ်၊ ဓာတ်ပုံ - Infinity Group)](https://i0.wp.com/www.ludunwayoo.com/wp-content/uploads/2022/11/316670812_521121393410651_89764663496021203_n.jpg?resize=880%2C495&ssl=1)
အိမ်ခြေ ၁၃၀ကျော်ရှိ ခဝါသည်ရွာကို စစ်ကောင်စီတပ် မီးရှို့ခဲ့ရာ နေအိမ် ၉၅ လုံး ပျက်စီးခဲ့ရကြောင်း အသိပေးထားသည်။ မီးလောင်မှုကြောင့် စားနပ်ရိက္ခာများ၊ အဝတ်အထည်နှင့် အိမ်အသုံးအဆောင်များ မီးလောင်ပျက်စီးခဲ့ရသည်ဟု ဆိုသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
“သက်ကြီးရွယ်အို ၇၁ယောက်ရှိတယ်။ လူကြီးတွေနဲ့ဆိုတော့ စစ်ကြောင်းလာလို့ ပြေးတဲ့အခါ နည်းနည်း ကသီလင်တ ဖြစ်တာမျိုးတွေရှိတယ်။ အခုဆောင်းရာသီဆိုတော့ ကလေးတွေကလည်း ရာသီအကူးအပြောင်း ကာလမှာ အအေးမိ၊ဖျားနာ၊ ချောင်းဆိုးတွေဖြစ်ကြတယ်”ဟု ခဝါသည်ရွာခံများအား ကျန်းမာရေး စောင့်ရှောက်မှု ပေးနေသူ တစ်ဦး၏ ပြောကြားချက်ကို ဖော်ပြထားသည်။
![(ခဝါသည်ကျေးရွာကို စစ်ကောင်စီတပ်က နိုဝင်ဘာ ၂၁ရက်တွင် မီးရှို့ဖျက်ဆီးပြီးနောက် တွေ့ရစဥ်၊ ဓာတ်ပုံ - Infinity Group)](https://i0.wp.com/www.ludunwayoo.com/wp-content/uploads/2022/11/317240825_521121616743962_3853970545884911325_n.jpg?resize=880%2C495&ssl=1)
စစ်ကောင်စီတပ်သည် ယခုနှစ်အတွင်း ကျွန်းလှမြို့နယ်မှ ကျေးရွာ (၁၁)ရွာကို မီးရှို့ဖျက်ဆီးမှုများ လုပ်ဆောင်ခဲ့ရာ နေအိမ် ၅၅၀ခန့် ပျက်စီးဆုံးရှုံးခဲ့ရသည်ဟုဆိုသည်။ ထို့ပြင် စစ်ကောင်စီတပ်များ စစ်ကြောင်းထိုး ဝင်ရောက်လာပါက ဒေသခံ ရွာသူ၊ရွာသားများ ထွက်ပြေးတိမ်းရှောင်ကြရပြီး အခက်အခဲများစွာ ကြုံနေကြရသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)