စစ်ကိုင်းတိုင်း ကျွန်းလှမြို့နယ် ခဝါသည်ကျေးရွာကို စစ်ကောင်စီတပ်က နိုဝင်ဘာ ၂၁ရက်တွင် မီးရှို့ခဲ့ရာ ရွာလုံးကျွတ်နီးပါး မီးလောင်ပျက်စီးခဲ့၍ ဒေသခံပြည်သူများအရေးပေါ် အကူအညီ လိုအပ်လျက်ရှိသည်ဟု ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က အသိပေးထားသည်။
အိမ်ခြေ ၁၃၀ကျော်ရှိ ခဝါသည်ရွာကို စစ်ကောင်စီတပ် မီးရှို့ခဲ့ရာ နေအိမ် ၉၅ လုံး ပျက်စီးခဲ့ရကြောင်း အသိပေးထားသည်။ မီးလောင်မှုကြောင့် စားနပ်ရိက္ခာများ၊ အဝတ်အထည်နှင့် အိမ်အသုံးအဆောင်များ မီးလောင်ပျက်စီးခဲ့ရသည်ဟု ဆိုသည်။
“သက်ကြီးရွယ်အို ၇၁ယောက်ရှိတယ်။ လူကြီးတွေနဲ့ဆိုတော့ စစ်ကြောင်းလာလို့ ပြေးတဲ့အခါ နည်းနည်း ကသီလင်တ ဖြစ်တာမျိုးတွေရှိတယ်။ အခုဆောင်းရာသီဆိုတော့ ကလေးတွေကလည်း ရာသီအကူးအပြောင်း ကာလမှာ အအေးမိ၊ဖျားနာ၊ ချောင်းဆိုးတွေဖြစ်ကြတယ်”ဟု ခဝါသည်ရွာခံများအား ကျန်းမာရေး စောင့်ရှောက်မှု ပေးနေသူ တစ်ဦး၏ ပြောကြားချက်ကို ဖော်ပြထားသည်။
စစ်ကောင်စီတပ်သည် ယခုနှစ်အတွင်း ကျွန်းလှမြို့နယ်မှ ကျေးရွာ (၁၁)ရွာကို မီးရှို့ဖျက်ဆီးမှုများ လုပ်ဆောင်ခဲ့ရာ နေအိမ် ၅၅၀ခန့် ပျက်စီးဆုံးရှုံးခဲ့ရသည်ဟုဆိုသည်။ ထို့ပြင် စစ်ကောင်စီတပ်များ စစ်ကြောင်းထိုး ဝင်ရောက်လာပါက ဒေသခံ ရွာသူ၊ရွာသားများ ထွက်ပြေးတိမ်းရှောင်ကြရပြီး အခက်အခဲများစွာ ကြုံနေကြရသည်။
