▪︎တမူးမှပြည်သူတစ်ဦးထံမှကျပ်သိန်း၁၀၀ ကျော်လုယက်သတ်ဖြတ်သွားသောပျူများပြစ်မှုအတွက်တာဝန်ခံရမည်ဟုသတိပေး
တိုင်းပြည်မငြိမ်သက်သည့်အချိန်တွင် လက်ဝတ်ရတနာများအများအပြား ဝတ်ဆင်ခြင်းနှင့် ငွေကြေးအများအပြားယူဆောင်သွားခြင်းကို အတတ်နိုင်ဆုံးရှောင်ကြဉ်ကြရန် တမူးဒေသခံပြည်သူလူထုအားတမူးမြို့မှ ပြည်သူ့ကာကွယ်ရေးအဖွဲ့များဖွဲ့စည်းထားသည့် Central Intelligence Agency Tamu(တမူး-CIA)ကတိုက်တွန်းချက်ထုတ်ပြန်သည်။
တမူးတွင် နိုဝင်ဘာ ၂၅ရက်က ဒေသခံအမျိုးသားတစ်ဦးကို ပျုစောထီးခေါင်းဆောင် ချမ်းမြေ့ဦးဆောင်သည့်အဖွဲ့က သတ်ဖြတ်ပြီး ငွေ ကျပ်သိန်းတစ်ရာကျော်၊ ဖုန်းနှင့်ဆိုင်ကယ်ကိုပါလုယက်သွားကြောင်း ဒေသခံများကပြောသည်။ ထို့ကြောင့်ဒေသခံပြည်သူတစ်ဦးကို သတ်ဖြတ်လုယက်မှုကိုပျူစောထီးများ ကျူးလွန်ခဲ့ခြင်းဖြစ်ပြီး ပြစ်မှုကျူးလွန်သူများအပြည့်အဝတာဝန်ခံရမည်ဟုလည်း CIA က သတိပေးလိုက်သည်။
” တမူးတွင်ပျူစောထီးများ နေရာအနှံ့ လုယက်မှုကျူးလွန်နေခြင်းကို မိမိတို့အတိအကျသိရှိထားပြီး ဖြစ်ကြောင်းနှင့် ဆက်လက်လုပ်ဆောင်ပါကဖြစ်ပေါ်လာမည့် နောက်ဆက်တွဲအကျိုးများခံစားရမည်ဖြစ်ကြောင်းထုတ်ပြန်ကြေညာအပ်သည်” ဟု CIAတမူးကနိုဝင်ဘာ ၂၆ရက်တွင်ထုတ်ပြန်သည်။
ပျူစောထီးခေါင်းဆောင်း ချမ်းမြေ့ဦးဆောင်သည့်အဖွဲ့က သတ်ဖြတ်လုယက်သူမှာ ငွေလွှဲလုပ်ငန်းလုပ်ကိုင်သောအသက် ၂၇နှစ်အရွယ် ရာဂျူးဆိုသူ ဖြစ်သည်။ ရာဂျူးသည်ကျပ်သိန်းတစ်ရာကျော်တန်ကြေးရှိသော အိန္ဒိယရူပီးငွေ သုံးသိန်းခွဲကို ဆိုင်ကယ်ဘောက်အတွင်းထည့်ပြီးသယ်လာစဉ် နိုဝင်ဘာ ၂၅ရက်ညနေပိုင်း၌ ပျူစောထီးများကလုယက်ပြီး သေနတ်ဖြင့် ပစ်သတ်ခံရခြင်းဖြစ်ကြောင်း ဒေသခံများကပြောသည်။
“ချမ်းမြေ့ဆိုတဲ့ပျူခေါင်းဆောင်ကိုမရှင်းနိုင်ရင်တော့ဒေသခံတွေ ကျီးလန့်စာစားဖြစ်နေမှာပဲ။ CIA တမူးအနေနဲ့လည်း သတိပေးပြီးနောက်ပိုင်း အရေးယူနိုင်ဖို့လိုတယ်။ ထုတ်ပြန်ချက်သက်သက်နဲ့တော့ အလုပ်မဖြစ်ဘူး” ဟုတမူးမြို့ခံတစ်ဦးကပြောသည်။
CIAတမူးက ဒေသခံပြည်သူလူထုအနေဖြင့် တိုင်းပြည်မငြိမ်သက်သည့်အချိန်၌ လက်ဝတ်ရတနာများအများအပြား ဝတ်ဆင်ခြင်းနှင့် ငွေကြေးအများအပြားယူဆောင်ခြင်းကိုအတတ်နိုင်ဆုံးရှောင်ကြဉ်ကြပါရန်လည်းအကြံပြုထားသည်။
