မန္တလေးတိုင်း၊ မတ္တရာမြို့နယ်တွင် ယမန်နေ့တစ်ရက်တည်း စစ်ကောင်စီတပ်ကို ၃ ကြိမ်တိုက်ခိုက်ရာ စစ်ကောင်စီတပ်ဖွဲ့ဝင် ၁၀ ဦးခန့်သေဆုံးပြီး ကျည်များနှင့် ခိုးရာပါပစ္စည်းများ သိမ်းဆည်းရမိခဲ့ကြောင်း နတ်ဆိုးမြေအောက်တော်လှန်ရေးတပ်ဖွဲ့က သတင်းထုတ်ပြန်သည်။
ယမန်နေ့ နိုဝင်ဘာလ ၃၀ ရက်နေ့ မွန်းလွဲ ၁၂ နာရီခွဲခန့်က မတ္တရာမြို့နယ်၊ မြောင်းသစ်တံတားနက်ပေါ်သို့ တက်လာသော စစ်ကောင်စီကား ငါးစီးပါယာဥ်တန်းကို ပဒေသာမိုင်း ၂ လုံးတွဲဖြင့် မိုင်းဆွဲတိုက်ခိုက်ခဲ့ရာ စစ်ကောင်စီတပ်သား နှစ်ဦးသေဆုံးပြီး ၂၅ ဦး ဒဏ်ရာရရှိသွားကြောင်း နတ်ဆိုးမြေအောက်တော်လှန်ရေးတပ်ဖွဲ့က အသိပေးသည်။
ထို့အပြင် မွန်းလွဲ ၃ နာရီကျော်တွင် မြောင်းဦးတောင်ဘက် တောင်ကံရွာအတွင်းသို့ ခြေလျင်စစ်ကြောင်းထိုးလာသော စစ်ကောင်စီတပ်သား ၁၂ ဦးကို ထပ်မံမိုင်းဆွဲတိုက်ခိုက်ခဲ့ရာ ၈ ဦးသေဆုံးပြီး ၂ ဦး ထိခိုက်ဒဏ်ရာရရှိသွားကြောင်း အဆိုပါအဖွဲ့က အသိပေးသည်။
ယမန်နေ့ နံနက် ၇နာရီခန့်ကလည်း မြောင်းဦးနှင့် ကျပ်ပြင်ရွာကြား ငုတ်ပြွန်အနီးသို့ မောင်းနှင်လာသော စစ်ကောင်စီတပ်၏ ထောက်ပို့ပစ္စည်းများ သယ်ဆောင်လာသည့် ထော်လာဂျီကို နတ်ဆိုး(မြေအောက်တော်လှန်ရေးတပ်ဖွဲ့)က ကြားဖြတ်ဖမ်းဆီးခဲ့သည်။
ထော်လာဂျီမောင်းနှင်လာသူမှာ ရွာသားတစ်ဦးဖြစ်ပြီး ထိုယာဥ်ပေါ်ရှိ ကျည်ဆံများနှင့် စစ်ကောင်စီတပ်သားများ၏ မှတ်ပုံတင်အချို့၊ နိုင်ငံကူး လတ်မှတ်များ အပါအဝင် ဒေသခံများထံက ခိုးယူလုယက်လာသော အခြားအသုံးအဆောင်ပစ္စည်းများကို သိမ်းဆည်းရရှိခဲ့ကြောင်း နတ်ဆိုးမြေအောက်တော်လှန်ရေးတပ်ဖွဲ့က အသိပေးခဲ့သည်။
ဖြစ်စဥ်နှင့်ပတ်သက်၍ နတ်ဆိုးမြေအောက်တော်လှန်ရေးတပ်ဖွဲ့ထံ People’s Spring ကဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
နိုဝင်ဘာလ ၂၈ ရက်နေ့ နံနက် ၈ နာရီခွဲခန့်ကလည်း ပျားတိုက်နှင့် ကျပ်ပြင်ရွာကြား၊ တံတားကွေ့တွင် စစ်ကောင်စီတပ်သား၅ ဦးပါ ကားတစ်စီးကို ပဒေသာမိုင်း ၂လုံးတွဲဖြင့် မိုင်းဆွဲတိုက်ခိုက်ခဲ့ရာ စစ်ကောင်စီတပ်သား ၂ ဦးသေဆုံးပြီး သုံးဦး ဒဏ်ရာရှိကြောင်း နတ်ဆိုးမြေအောက်တော်လှန်ရေးတပ်ဖွဲ့က သတင်းထုတ်ပြန်ထားသည်။
