ရန်ကုန်တိုင်း ခရမ်းမြို့နယ်မှ CDMကျောင်းဆရာတစ်ဦးကို မတရားပုဒ်မတပ်ကာ အလုပ်ကြမ်းနှင့်ထောင်ဒဏ် (၁၀)နှစ်ချမှတ်သည့်အပေါ်ကန့်ကွက်ကြောင်း ယင်းမြို့နယ်အခြေခံပညာ ပညာရေးလုပ်သားများသမဂ္ဂမှ တာဝန်ရှိသူတစ်ဦးက ပြောသည်။
“၅၀(ည)လို့တော့ သိရပါတယ်။ သူကပုံမှန် CDMတစ်ဦးပါပဲ။ သူ့အိမ်မှာပုံမှန်ပဲနေထိုင်ပြီး မိသားစုနဲ့အတူနေတာပါ”ဟု ၎င်းက ပြောသည်။
မတရားပုဒ်မတပ်ကာ ပြစ်ဒဏ်ချခံရသည့် ဦးထက်မြတ်အောင်သည် ခရမ်းမြို့နယ် အ.ထ.က (ခွဲ)ကံကောင်းဟောင်းတွင် မူလတန်းပြဆရာအဖြစ် တာဝန်ထမ်းဆောင်ခဲ့သူဖြစ်ပြီး စစ်အာဏာ သိမ်းမှုနောက်ပိုင်းတွင် CDMလှုပ်ရှားမှု၌ ပါဝင်ခဲ့သူဖြစ်သည်။
ဦးထက်မြတ်အောင်ကို ဖေဖော်ဝါရီ ၂၃ရက်တွင် နေအိမ်သို့ဝင်ရောက်၍ မတရားဖမ်းဆီးခဲ့ခြင်းဖြစ်ပြီး ပြစ်မှူကျူးလွန်ထားခြင်းမရှိဘဲ မတရားစွပ်စွဲချက်များဖြင့် အမှုဆင်ကာ ဒီဇင်ဘာ ၂ရက်တွင် ပြစ်ဒဏ်ချမှတ်ခဲ့ခြင်းဖြစ်သည်ဟု အထက်ပါတာဝန်ရှိသူက ပြောသည်။
“ယခုလပိုင်းအတွင်း မတရားဖမ်းဆီးထိန်းသိမ်းခံထားရသူများ ကြီးလေးသောပြစ်ဒဏ်များ ချမှတ်နေခြင်းအပေါ် ဖမ်းဆီးထိန်းသိမ်းခံထားရသူများ၏ လုံခြုံရေးအထူးစိုးရိမ်စရာရှိနေပါကြောင်းနှင့် ကျွန်ုပ်တို့ CDMဝန်ထမ်းများအပေါ် မတရားဖမ်းဆီးထောင်ချနေမှုများ၊ လူ့အခွင့် အရေး ချိုးဖောက်နေမှုများကို ပြင်းထန်စွာကန့်ကွက်ဆန့်ကျင်ပါသည်။”ဟု ခရမ်းမြို့နယ် အခြေခံပညာ ပညာရေးလုပ်သားများသမဂ္ဂက ကြေညာချက်ထုတ်ပြန်ထားသည်။
