နီပေါနိုင်ငံရှိ ကျောင်းသားသမဂ္ဂနှင့် ကျောင်းသားလူငယ်များက ယမန်နေ့ (ဒီဇင်ဘာ ၅)တွင် မြန်မာနိုင်ငံရှိ ဒဂုံတက္ကသိုလ်ကျောင်းသား ခုနစ်ဦး အပါအဝင်ယုံကြည်ချက်ကြောင့် သေဒဏ်ကျခံနေရသူများနှင့်အတူရပ်တည်ကြောင်း ဆန္ဒထုတ်ဖော်ခဲ့သည်ဟု ဒဂုံတက္ကသိုလ်ကျောင်းသားများ သမဂ္ဂက ပြန်လည် ဖော်ပြသည်။
ယမန်နေ့တွင် နီပေါကျောင်းသားသမဂ္ဂမှ ကျောင်းသားများက မြန်မာစစ်တပ်၏ မတရားသဖြင့် သေဒဏ်များ စီရင်နေသည့် ဆုံးဖြတ်ချက်ကို ဆန့်ကျင်ကြောင်း နီပေါနိုင်ငံရှိ မြန်မာသံရုံးရှေ့၌ ဆန္ဒပြခဲ့ကြသည်။
ယင်းဆန္ဒပြ လှုပ်ရှားမှု လုပ်ဆောင်ခဲ့သည့် ကျောင်းသားအချို့ကို နီပေါရဲတပ်ဖွဲ့မှ ဖမ်းဆီးခဲ့ခံရမှုလည်း ရှိခဲ့ကြောင်း သိရသည်။
အာဏာသိမ်း မြန်မာစစ်အုပ်စုသည် ပြီးခဲ့သည့် နိုဝင်ဘာ ၃၀ရက်က ဒဂုံတက္ကသိုလ်ကျောင်းသား ခုနစ်ဦးဖြစ်သည့် ကိုခန့်ဇင်ဝင်း၊ ကိုသူရမောင်မောင်၊ ကိုဇော်လင်းနိုင်၊ ကိုသီဟထက်ဇော်၊ ကိုဟိန်းထက်၊ ကိုသက်ပိုင်ဦးနှင့်ကိုခန့်လင်းမောင်မောင် တို့ကို မတရားသဖြင့် သေဒဏ်ချမှတ်ခဲ့ခြင်း ဖြစ်သည်။
