စားနပ်ရိက္ခာထောက်ပံ့ဖို့ WFP ကို ဥရောပသမဂ္ဂ ယူရိုငွေ ၆ သန်းခွဲပံ့ပိုး

မြန်မာနိုင်ငံမှာ စားနပ်ရိက္ခာ ထောက်ပံ့တာအပြင် ပံ့ပိုးကူညီတာတွေလုပ်ဖို့ ကမ္ဘာ့စားနပ်ရိက္ခာအဖွဲ့ (WFP)ကို ဥရောပသမဂ္ဂက ယူရိုငွေ ၆ သန်းခွဲ လှူဒါန်းလိုက်ပါတယ်။

ဥရောပ သမဂ္ဂ က လှူဒါန်းတဲ့အဲဒီရန်ပုံငွေနဲ့ မြန်မာနိုင်ငံ အရှေ့တောင်ပိုင်းဒေသတွေ ၊ အနောက်မြောက်ပိုင်းဒေသတွေ ၊ နယ်စပ်ဒေသတွေအပြင် ရန်ကုန်မြို့မှာရှိတဲ့ ဆင်းရဲနွမ်းပါးတဲ့ မြို့နယ်တွေက လူဦးရေ ၈ သိန်းကျော်ကို ထောက်ပံ့ပေးသွားတယ်လို့ WFP က ပြောပါတယ်။

WFP ဟာ ပြည်တွင်းက ပဋိပက္ခဒဏ်ခံစားနေရတဲ့ ဒေသတွေမှာရှိတဲ့ မိသားစုတွေကို စားနပ်ရိက္ခာ၊ ငွေသားနဲ့ အာဟာရ အထောက်အပံတွေ ပံ့ပိုးပေးသွားမယ်လို့ ထုတ်ပြန်ထားပါတယ်။

ဒီလို ပံ့ပိုးပေးရာမှာ ချင်း ၊ကယား ၊မကွေးနဲ့ စစ်ကိုင်းတိုင်းက အကူအညီလိုအပ်နေတဲ့ ပြည်သူတွေဆီ သွားရောက်ကူညီဖို့ ကန့်သတ်ချက်တွေရှိနေတယ်လို့လည်း WFP က ဝန်ခံထားပါတယ်။

စစ်တပ်အာဏာသိမ်းထားတဲ့ မြန်မာနိုင်ငံမှာ လူဦးရေ ၁၅ သန်းဟာ ဝမ်းရေးအခက်အခဲကို အပြင်းအထန်ကြုံတွေ့နေရပြီး အခြေခံစားသောက်ကုန်ဈေးနှုန်းတွေဟာ တစ်နှစ်အတွင်းမှာတင် ၆၂ ရာခိုင်နှုန်းမြင့်တက်လာတယ်လို့ WFP ရဲ့အချက်အလက်တွေအရသိရပါတယ်။