စစ်ကိုင်းတိုင်း၊ ဒီပဲယင်းမြို့နယ်တွင် စစ်ကောင်စီတပ်က ယနေ့တစ်ရက်တည်း ကျေးရွာခြောက်ရွာထက်မနည်း မီးရှို့ဖျက်ဆီးနေကြောင်း ဒေသတွင်းသတင်းရင်းမြစ်များက ပြောသည်။
ယနေ့ (ဒီဇင်ဘာ ၉ ရက်)နံနက်ပိုင်းက စစ်ကောင်စီတပ်သည် ဒီပဲယင်းနယ်အရှေ့ခြမ်း မူးရိုးကုန်း၊ ယဉ်ကျေးနှင့် ရုံးသာကျေးရွာများကို ထပ်မံ၍ မီးရှို့ဖျက်ဆီးခဲ့ကြောင်း၊ မွန်းလွဲပိုင်းတွင် သပြေသာရွာ၊ ဝဲကြီးကျေးရွာနှင့် မူးခတွင်းကျေးရွာများကိုလည်း ဝင်ရောက် မီးရှို့ဖျက်ဆီးမှုများ ပြုလုပ်နေကြောင်း ဒေသခံများက ပြောသည်။
![(မီးရှို့ဖျက်ဆီးခံရသော ကျေးရွာတစ်ရွာအား တွေ့ရစဥ်၊ ဓာတ်ပုံ-ဒီပဲယင်းမြို့နယ် ညီနောင်များအဖွဲ့)](https://i0.wp.com/www.ludunwayoo.com/wp-content/uploads/2022/12/318215987_530486432474147_4480753871051720361_n.png?resize=720%2C325&ssl=1)
![(မီးရှို့ဖျက်ဆီးခံရသော ကျေးရွာတစ်ရွာအား တွေ့ရစဥ်၊ ဓာတ်ပုံ-ဒီပဲယင်းမြို့နယ် ညီနောင်များအဖွဲ့)](https://i0.wp.com/www.ludunwayoo.com/wp-content/uploads/2022/12/318431275_530486552474135_5650838863020848486_n.png?resize=720%2C325&ssl=1)
![(မီးရှို့ဖျက်ဆီးခံရသော ကျေးရွာတစ်ရွာအား တွေ့ရစဥ်၊ ဓာတ်ပုံ-ဒီပဲယင်းမြို့နယ် ညီနောင်များအဖွဲ့)](https://i0.wp.com/www.ludunwayoo.com/wp-content/uploads/2022/12/318205466_530486592474131_2308439285459069693_n.png?resize=720%2C325&ssl=1)
![(မီးရှို့ဖျက်ဆီးခံရသော ကျေးရွာတစ်ရွာအား တွေ့ရစဥ်၊ ဓာတ်ပုံ-ဒီပဲယင်းမြို့နယ် ညီနောင်များအဖွဲ့)](https://i0.wp.com/www.ludunwayoo.com/wp-content/uploads/2022/12/319106015_530486292474161_2127203071354305302_n.png?resize=720%2C405&ssl=1)
“အိမ်တွေတော့ စာရင်းမကောက်နိုင်သေးဘူးခင်ဗျ။ စ…(စစ်ကောင်စိတပ်သား)တွေက နေရာအနှံ့ဖြန့်ထားလို့ အခြေနေတွေမသိရသေးဘူး။ မီးရှို့ဖို့သက်သက် ပြည်သူကို ဒုက္ခပေးဖို့ သက်သက်လာတာလားမသိပါဘူးဗျာ။ နေ့စဉ်ရက်ဆက်ရှို့နေတာ။”ဟု ဒီပဲယင်းမြို့နယ် ညီနောင်များအဖွဲ့က ပြောသည်။
ထို့အပြင် စစ်ဘေးရှောင်နှင့် မီးဘေးသင့်ပြည်သူများအတွက် အစားအစာ၊ အဝတ်ထည်နှင့် စောင်များ လိုအပ်လျက်ရှိသည်ဟု ဆိုသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
စစ်ကောင်စီတပ်သည် ဒီပဲယင်းမြို့နယ်အတွင်း ဒီဇင်ဘာ ၁ရက်မှစတင်ကာ ယနေ့အထိ ဘုန်းကြီးကျောင်း သုံးကျောင်းနှင့် ကျေးရွာ(၁၄)ရွာထက်မနည်း မီးရှို့ဖျက်ဆီးထားပြီး ဖမ်းဆီးသတ်ဖြတ်ခံရသူများလည်းရှိနေသည်။
ဒီပဲယင်းမြို့နယ်တွင် စစ်ကောင်စီက စစ်ကြောင်းနှစ်ခုထိုးနေ၍ ကျေးရွာ (၃၁)ရွာမှ ဒေသခံ ပြည်သူသုံးသောင်းတစ်ထောင်ကျော် ထွက်ပြေးတိမ်းရှောင်နေရကြောင်း မြို့နယ်(ပအဖ) စာရင်းကို ကိုးကားကာ ဒီပဲယင်းမြို့နယ်ညီနောင်များအဖွဲ့က ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)