စစ်ကိုင်းတိုင်း၊ တန့်ဆည်မြို့နယ်တွင် ကင်းလှည့်လာသည့် စစ်ကောင်စီတပ်သားများနှင့်ပျူစောထီးများအား တိုက်မိုင်းဖြင့် ဖောက်ခွဲတိုက်ခိုက်ရာ စစ်အုပ်စုထိခိုက်သေဆုံးမှုရှိကြောင်း တန့်ဆည်မြို့နယ် ပြည်သူ့ကာကွယ်ရေးအဖွဲ့-ပကဖ သတင်းနှင့် ပြန်ကြားရေး တာဝန်ခံက ပြောသည်။
ယမန်နေ့ (ဒီဇင်ဘာ ၁၁ ရက်) နံနက် ၈ နာရီ ၄၅ မိနစ်ခန့်က တန့်ဆည်မြို့နယ်၊ ဘေရင်းရွာသစ်အတွင်း စစ်ကောင်စီတပ်နှင့်ပျူများ ကင်းလှည့်လာစဥ် ပ.က.ဖ အဖွဲ့က တိုက်မိုင်း နှစ်ကြိမ်ခွဲကာ တိုက်ခိုက်ခဲ့သည်။
စစ်ကောင်စီတပ်ဖွဲ့ဝင်တစ်ဦးနှင့် ပျူ နှစ်ဦးသေဆုံးကာ အများအပြား ဒဏ်ရာရရှိသွားကြောင်း တန့်ဆည်(ပကဖ)သတင်းနှင့် ပြန်ကြားရေး တာဝန်ခံက ပြောသည်။
” မိုင်းတွေက တိုက်မိုင်းနှစ်လုံးထောင်ထားတာ။ မနက်ခင်းစောစောပိုင်းကို ကင်းလှည့်တာခေါ်မှာပေါ့။ တစ်ပွိုင့်ပဲမိတာ။”ဟု ၎င်းတာဝန်ခံက ပြောသည်။
တန့်ဆည်မြို့နယ်တွင် စစ်ကောင်စီတပ်က ဒီဇင်ဘာ၄ရက်နှင့်၅ရက်က သာဂေါင်ကြီးရွာရှိ နေအိမ် ၇၆လုံး၊ ကမ်းဖြူရွာရှိ နေအိမ် ၄၀လုံး၊ ဝက်တိုးရွာရှိ နေအိမ် ၁၇ လုံးနှင့် ပုတီးကျေးရွာရှိနေအိမ် ၆ လုံး စုစုပေါင်း ၁၃၉ လုံး ထပ်မံမီးရှို့ဖျက်ဆီးသွားသည်။
စစ်တပ်အာဏာသိမ်းပြီးနောက်ပိုင်း တန့်ဆည်မြို့နယ်တွင် ရွာလုံးကျွတ်မီးရှို့ခံရသောကျေးရွာ ၇ ရွာအပါအဝင် ကျေးရွာ ၇၄ ရွာမှ နေအိမ်ပေါင်း ၂,၅၀၆ လုံး မီးရှို့ဖျက်ဆီးခံခဲ့ရသည်။
နေအိမ် အလုံး ၃၀၀ကို အိမ်တိုင်များလှီးဖြတ်ခြင်းကဲ့သို့ ဖျက်ဆီးခြင်းခံခဲ့ရသည်။ သာသနိကအဆောက်အဦး ၉ လုံး၊ ကျေးရွာစာကြည့်တိုက် တစ်ခုနှင့် ဆေးခန်းတစ်ခုလည်းမီးရှို့ဖျက်ဆီး ခံခဲ့ရသည်။
