စစ်ကောင်စီတပ် လေးဦးသေ၊ နှစ်ဦးဒဏ်ရာပြင်းထန်ဟုဆို
ပဲခူးတိုင်း ရေတာရှည်မြို့နယ် စည်ပိုင်းကျေးရွာအနီးတပ်စွဲထားသည့် စစ်ကောင်စီတပ်စွဲရာ နေရာအား အဝေးထိန်းမိုင်းနှစ်လုံးဖြင့် ဖောက်ခွဲတိုက်ခိုက်ခဲ့ကြောင်း တောင်ငူခရိုင် PDF တပ်ရင်း (၃၅၀၁)၊ တပ်ခွဲ (၃) ဒေါင်းမင်းသားပြောက်ကျားတပ်ဖွဲ့က ပြောသည်။
စစ်တောင်းမြစ်အရှေ့ဘက် စည်ပိုင်းကျေးရွာ၌ အင်အား ၃၆ ဦးခန့်ဖြင့် အထိုင်ချထားသော စစ်ကောင်စီတပ်ကို ယမန်နေ့(ဒီဇင်ဘာ ၁၁) ည ၇နာရီကျော်က အဝေးထိန်းမိုင်းနှစ်လုံးဖြင့် ဖောက်ခွဲတိုက်ခိုက်ခဲ့ခြင်းဖြစ်ပြီး စစ်ကောင်စီတပ်မှ လေးဦးသေဆုံးကာ နှစ်ဦးဒဏ်ရာပြင်း ထန်စွာရသွားသည်ဟု ဆိုသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
“သူတို့က စည်ပိုင်းရွာအရှေ့ နဂျပ်ရွာဘက်သွားတဲ့အချိန်နောက်ကနေဝင်ပြီး ထောင်ခဲ့တာ။ ပြန်လာနားတဲ့အချိန်မိုင်းကွင်းတည့်တည့်ဆိုက်မှ ခွဲချပစ်တာ”ဟု ဒေါင်းမင်း သား ပြောက်ကျား တပ်ဖွဲ့တာဝန်ခံ ရဲဘော်နေသူရိန်က ပြောသည်။
စစ်ကောင်စီတပ်အား ထိုကဲ့သို့ ဖောက်ခွဲတိုက်ခိုက်နိုင်ရန် မိုင်းထောင်ပြီးနောက် (၃)ရက်ခန့် အချိန်ယူစောင့်ဆိုင်းခဲ့ရပြီး ယမန်နေ့ညကမှ ပိုင်ပိုင်နိုင်နိုင်ဖောက်ခွဲနိုင်ခဲ့ခြင်းဖြစ် ကြောင်း ၎င်းက ရှင်းပြသည်။
တိုက်ခိုက်ခံရမှုကြောင့် ထိခိုက်သေဆုံးသူများနှင့် ဒဏ်ရာရသူများအား စစ်ကောင်စီတပ်မှ ဆွာဆေးရုံသို့ ညတွင်းချင်းပို့လိုက်ကြောင်း စုံစမ်းသိရသည်။သို့သော် စစ်ကောင်စီတပ်သားများ ထိခိုက်သေဆုံးမှုနှင့် ပတ်သက်ပြီး People’s Spring က သီးခြားအတည်မပြုနိုင်သေးပေ။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)