မကွေးတိုင်း၊ ရေစကြိုမြို့နယ်၊ ပခန်းကြီးမြို့နယ် ဟောင်းကျေးရွာ၌ စစ်ကောင်စီတပ်နှင့် ဒေသတွင်း PDF သုံးဖွဲ့ ထိတွေ့တိုက်ပွဲဖြစ်ပွားခဲ့ပြီး ဖမ်းဆီးခံရသည့်ပြည်သူတစ်ဦးအား ကယ်ထုတ်နိုင်ခဲ့ကြောင်း ပခုက္ကူမြို့ပြပြောက်ကျားတပ်ဖွဲ့(၁)၊ တပ်ခွဲ – ၁က ထုတ်ပြန်သည်။
ဒီဇင်ဘာ ၁၁ရက် နံနက်ပိုင်းက စစ်ကောင်စီတပ်သည် ရေစကြိုမြိုနယ်၊ပခန်းကြီးကျေးရွာ အနောက်ဘက်တွင် ခရီးသွားပြည်သူများအား စစ်ဆေးခြိမ်းခြောက် ခဲ့သည်။
ထို့နောက် ပြည်သူတစ်ဦးအား ဖမ်းဆီးပြီးနောက် မြေခဲတောင်ရွာအားဝင်ရောက်ရန် ထွက်ခွာလာချိန် မဟာမိတ် သုံးဖွဲ့က တိုက်ခိုက်ခဲ့ကြောင်း ပခုက္ကူမြို့ပြပြောက်ကျားတပ်ဖွဲ့ (၁)၊တပ်ခွဲ-၁က အသိပေးသည်။
မဟာမိတ်ရဲဘော်များနှင့် စစ်ကောင်စီတပ်များအပြန်အလှန်ထိတွေ့တိုက်ပွဲဖြစ်ပွားပြီး ဖမ်းဆီးခံရသည့် ပြည်သူအား ကယ်ထုတ်နိုင်ခဲ့သည်ဟု ဆိုသည်။
စစ်ကောင်စီဘက်က လက်နက်အင်အားသာလွန် ၍ ဆုတ်ခွာခဲ့ပြီး စစ်အုပ်စုထိခိုက်မှုမသိရသေးကြောင်း၊ ရဲဘော်များအားလုံးအထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း ထုတ်ပြန်ချက်တွင် ဖော်ပြသည်။
အဆိုပါ စစ်ဆင်ရေးကို ပခုက္ကူမြို့ပြပြောက်ကျား တပ်ဖွဲ့-တပ်ခွဲ ၁ ၊ Urban Undergground Force၊ 27 Revolution Forceတို့ ပူးပေါင်းကာ တိုက်ခိုက်ခဲ့ကြောင်း အသိပေးထားသည်။
ဖြစ်စဥ်နှင့်ပတ်သက်၍ ပခုက္ကူမြို့ပြပြောက်ကျား တပ်ဖွဲ့-၁၊တပ်ခွဲ- ၁ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
ပခုက္ကူမြို့ပြပြောက်ကျားတပ်ဖွဲ့ (၁)၊တပ်ခွဲ- ၁သည် ဒီဇင်ဘာ ၁ ရက်ကလည်း ညောင်ဦးမြို့နယ်၊ စဥ့်ကူနယ်မြေရဲစခန်းက စခန်းမှူးအပါအဝင် ရဲငါးဦးအား တက်မမှော်အတွင်းရှိ ဘီယာဆိုင်၌ ပစ်ခတ်တိုက်ခိုက် ခဲ့ရာ ငါးဦးလုံးသေဆုံးပြီး လက်နက်လေးလက်ပါ သိမ်းဆည်းနိုင်ခဲ့သည်။
