နယ်စပ်နားထိ ချဉ်းကပ် ပျံသန်းလာတဲ့ မြောက်ကိုရီးယား စစ်လေယာဉ်တွေကြောင့် လိုအပ်တဲ့ အရေးပေါ် တုံ့ပြန်မှုတွေ လုပ်ဆောင်ခဲ့ကြောင်း တောင်ကိုရီးယား လေတပ်က အတည်ပြုခဲ့ပါတယ်။
မြောက်ကိုရီးယား လေယာဉ် တစ်ဒါဇင်ဟာ အောက်တိုဘာ ၆ ရက် ညနေပိုင်းမှာ အုပ်စုဖွဲ့ပြီး ကိုရီးယား နှစ်နိုင်ငံ နယ်နိမိတ် သတ်မှတ်ရာ လေပိုင်နက်နားထိ ရောက်ရှိခဲ့ပါတယ်။ တောင်ကိုရီးယား စစ်တပ်ရဲ့ ရေဒါမှာ မြောက်ကိုရီးယား တိုက်လေယာဉ် ၈ စီးနဲ့ ဗုံးကြဲလေယာဉ် ၄ စီးကို ထောက်လှမ်းမိခဲ့တဲ့နောက် လေတပ်က တိုက်လေယာဉ် အစီး ၃၀ ကို ချက်ချင်း ပျံတက်စေပြီး စောင့်ကြည့်ခဲ့ပါတယ်။
မြောက်ကိုရီးယား လေယာဉ်တချို့ဟာ တောင်ကိုရီးယားက သတ်မှတ်ထားတဲ့ အထူး စောင့်ကြည့်ထောက်လှမ်းရေး ဇုန်ထဲထိ ရောက်ရှိခဲ့ပေမယ့် တောင်ကိုရီးယား လေပိုင်နက်ကိုတော့ မကျူးကျော်ခဲ့ပါဘူး။ တောင်ကိုရီးယားဟာ F-15Kတွေ အပါအဝင် တိုက်လေယာဉ် အစီး ၃၀ ကို စေလွှတ်ပြီး မြောက်ကိုရီးယား လေယာဉ်တွေရဲ့ လှုပ်ရှားမှုကို စောင့်ကြည့်စေခဲ့ပါတယ်။ နှစ်ဖက် လေယာဉ်တွေ ဘယ်လောက်ထိ နီးနီးကပ်ကပ် ရှိခဲ့သလဲ ဆိုတာကိုတော့ မသိရပါဘူး။
နောက်ပိုင်းမှာတော့ မြောက်ကိုရီးယား လေယာဉ်တွေဟာ သရုပ်တူ ဗုံးကြဲလေ့ကျင့်မှု တစ်ခုကို ပြုလုပ်ပြီး လှည့်ပြန်သွားခဲ့ကြပါတယ်။ တောင်ကိုရီးယား လေတပ်ကတော့ နောက်ထပ် နာရီပိုင်းလောက်ထိ အသင့်အနေအထား တပ်လှန့်ပြီး အခြေအနေကို ဆက်စောင့်ကြည့်ခဲ့ပါတယ်။
ပြီးခဲ့တဲ့ နှစ်ပတ်အတွင်း ဒုံးကျည် ခြောက်စင်းထိ ဆက်တိုက် ပစ်လွှတ်ပြခဲ့အပြီး အခုလို စစ်လေယာဉ်တွေ အုံလိုက်ကျင်းလိုက် နယ်စပ်နားထိ စေလွှတ်ခဲ့တာဟာ မြောက်ကိုရီးယားရဲ့ နောက်ထပ် ရန်စမှု တစ်ခုအဖြစ် တောင်ကိုရီးယားက စွပ်စွဲပါတယ်။ အခြေအနေတွေ တင်းမာနေချိန် အတောအတွင်း တောင်ကိုရီးယားနဲ့ အမေရိကန် ရေတပ်တွေကလည်း ကိုရီးယား ကျွန်းဆွယ်နားမှာ အင်အားကြီးမားတဲ့ စစ်ရေးလေ့ကျင့်မှု အစီအစဉ် တစ်ခုကို စတင်နေကြောင်း သိရပါတယ်။
