၂၀၂၁ စစ်အာဏာသိမ်းမှုကို ဆန့်ကျင်ခဲ့တဲ့ အစိုးရဝန်ထမ်းတွေရဲ့ CDM လို အောင်မြင်တဲ့ ပုဂ္ဂလိက CDM တွေကတော့ ကမ္ဘာသိတဲ့ လက်ပံတောင်းတောင် ကြေးနီစီမံကိန်း ဝန်ထမ်းတွေပါ။
ကြေးနီစီမံကိန်းတွေက အာဏာသိမ်းကာလ အစပိုင်းမှာ လည်ပတ်ခဲ့ပေမယ့် နောက်ပိုင်းမှာတော့ ဝန်ထမ်းတွေရဲ့ အကြမ်းမဖက် အာဏာဖီဆန်မှုကြောင့် ရပ်နားထားရတာ လက်ရှိချိန်အထိပါပဲ။
တရုတ်အစိုးရပိုင် Norinco China North Industries Group Coporation Limited)ရဲ့ လက်အောက်ခံကုမ္ပဏီဖြစ်တဲ့ တရုတ်ဝမ်ပေါင်ကုမ္ပဏီ၊ ယန်စီကုမ္ပဏီ ၊စစ်အုပ်စုရဲ့ မြန်မာစီးပွားရေးဦးပိုင်လီမိတက်၊ အစိုးရရဲ့ အမှတ် (၁) သတ္ထုတွင်းလုပ်ငန်းတို့အကျိုးတူပူးပေါင်းပြီးတော့ ၂၀၁၂ ကတည်းကလုပ်ကိုင်နေတာဖြစ်ပါတယ်။
ဒီစီမံကိန်းလုပ်ဆောင်နေတဲ့ကုမ္ပဏီတွေ လက်အောက်မှာ တာဝန်ထမ်းဆောင်နေတဲ့ ဝန်ထမ်း ၇၀၀၀ ထောင်ကျော်ရှိပြီး လက်ရှိအချိန်မှာတော့ ဝန်ထမ်းရာဂဏန်းသာ အလုပ်ဆင်းနေတယ်လို့ CDM ဝန်ထမ်းတစ်ဦးကပြောပါတယ်။
“လည်ပတ်လို့ရမလားဆိုပြီး ဝန်ထမ်းတွေကိုခေါ်တာတော့ရှိတယ်။ စမ်းကြည့်တာပေါ့။ ဝန်ထမ်းတွေရဲ့ အခြေအနေကို။ မရနိုင်ဘူးဆိုမှ လက်လျော့လိုက်တာ” လို့ အဲဒီ CDM ဝန်ထမ်းက ပြောပါတယ်။
ဝန်ထမ်းတွေ အလုပ်ဆင်းတာမရှိပေမယ့်လည်း အကြမ်းဖက်စစ်ကောင်စီတွေကတော့ စီမံကိန်းတွေရဲ့ အတွင်းစည်း နဲ့အပြင်စည်းတွေမှာ စောင့်ကြပ်ပေးတာတွေရှိတယ်လို့ပြောပါတယ်။
“သူတို့မသင်္ကာရင် သေနတ်နဲ့ လှမ်းပစ်တာ
တွေရှိတယ်။ ဟိုရက်က မှိုရှာသွားတဲ့သူကို သေနတ်နဲ့ လှမ်းပစ်တာခံရသေးတယ်” လို့ စီမံကိန်းတွေနားကရွာမှာနေထိုင်တဲ့ အမျိုးသားတစ်ဦးကပြောပါတယ်။
လူထုနွေဦးက ဒီစီမံကိန်းပတ်ဝန်းကျင်ကို သွားရောက် လေ့လာခဲ့ချိန်မှာ ကင်းတဲတွေလက်နက်ကိုင်တွေစောင့်နေတာကို တွေ့ခဲ့ရပါတယ်။
စီမံကိန်းနားကို မကပ်ရင်တော့ အန္တရာယ်မပြုသလို စီမံကိန်းတွေကို တိုက်ခိုက်တာမရှိရင် ရွာတွေကိုလည်း ဘာမှမလုပ်ဘူးလို့ သဘောတူညီမှုယူထားတယ်လို့ အထက်ပါ CDM ဝန်ထမ်းကဆိုပါတယ်။
စီမံကိန်း လည်ပတ်စဉ်ကာလက တစ်ရက်ကို ကြေးနီ ၂၅ တန်ပါတဲ့ ကုန်တင်ကားအနည်းဆုံး ၁၅ စီးခန့် သယ်ယူခဲ့ပြီး လက်ရှိအချိန်မှာတော့ ကြေးနီတွေ သယ်ယူမယ်ဆိုရင် လမ်းတစ်လျှောက်မှာ လုံခြုံရေး တင်းတင်းကျပ်ကျပ်စောင့်ပြီးမှ သယ်ယူရတယ်လို့ ကုမ္ပဏီဝန်ထမ်းတစ်ဦးကဆိုပါတယ်။
လုပ်ငန်းမလည်ပတ်နိုင်ပေမယ့် စီမံကိန်းတွေထဲမှာ ကြေးနီ အမြောက်အမြားသယ်ဖို့ ရှိနေသေးတယ်လို့လည်း ပြောပါတယ်။
ကိုဗစ်ကာလလို အချိန်မှာတောင် ကုမ္ပဏီတွေက လုပ်ငန်းတွေ လည်ပတ်နိုင်ဖို့ ဝန်ထမ်းတွေရဲ့လစာကိုမဖြတ်ဘဲ အပြည့်အဝပေးပြီး အလှည့်ကျအလုပ်ဆင်းခိုင်းခဲ့တာပါ။
လက်ရှိအချိန်မှာလည်း ကုမ္ပဏီတွေဘက်က ဝန်ထမ်းတွေကို သတ်မှတ်နှုန်းတစ်ခုနဲ့ လစဉ်ထောက်ပံ့ ပေးနေတယ်လို့ သိရပါတယ်။
လစာကောင်းတဲ့ အလုပ်ကို စွန့်လွှတ်ပြီး စီမံကိန်းတွေ ရပ်နားအောင်လုပ်ခဲ့ကြတာက ဒီစီမံကိန်းတွေကနေ စစ်အုပ်စုအတွက် ဝင်ငွေတွေစီးဆင်းနေတယ် လို့ယုံကြည်တာကြောင့်ပါ။
အညာဒေသက နွေဦးတော်လှန်ရေးအတွက် လက်နက်ကိုင်တော်လှန်ရာမှာလည်း တာဝန်ကျေသလို အစိုးရဝန်ထမ်းမဟုတ်ပေမယ့်လည်း စစ်အုပ်စု အတွက် အထောက်အပံ့ဖြစ်စေမယ့် ငွေကြေးစီးဆင်းမှုတွေမရနိုင်ဖို့ သူတို့စွမ်းနိုင်သမျှတောင့်ခံပေးနေကြတာပါ။
အရင်လို လစာကောင်းကောင်းမရပေမယ့်လည်း အပြုံးမပျက်ကြဘဲ သူတို့လုပ်ရပ်အတွက် ဂုဏ်ယူနေကြတာပါ။
