နှစ်နိုင်ငံ တင်းမာမှုတွေကို လျှော့ချဖို့ နယ်စပ်ဒေသက တပ်တွေကို တရုတ်ရော၊ အိန္ဒိယကပါ တစ်ဆင့်ချင်းစီ ပြန်လည် လျှော့ချ ရုပ်သိမ်းနေကြောင်း သိရပါတယ်။
အိန္ဒိယနဲ့ တရုတ် စစ်တပ်တွေ အလုံးအရင်း ဖြန့်ကျက် တပ်စွဲထားပြီး ဟိမဝန္တာ တောင်တန်းတွေနဲ့ ထိစပ်နေရာ လာဒက်ခ် ဒေသဟာ ကမ္ဘာပေါ်မှာ အစောင့်အကြပ် အများဆုံး နယ်စပ်ဒေသ တစ်ခုလို့ လူသိများပါတယ်။ တရုတ်နဲ့ အိန္ဒိယ စစ်တပ်တွေဟာ နယ်စပ်မှာ ကိုယ်ထိလက်ရောက် ရန်ပြု တိုက်ခိုက်မှုတွေလည်း ဖြစ်ခဲ့ဖူးပါတယ်။
လွန်ခဲ့တဲ့ ၂ နှစ်လောက်ကတော့ နှစ်ဖက်စစ်တပ်တွေ ခိုက်ရန်ဖြစ်ကြရာက လူပေါင်း ဒါဇင်နဲ့ချီ သေဆုံးခဲ့ပြီး အိမ်နီးချင်း အာရှအင်အားကြီး နိုင်ငံတွေကြား တင်းမာမှုက အမြင့်ဆုံးထိ ရောက်ရှိခဲ့ပါတယ်။ ဒါပေမဲ့ နောက်ပိုင်းမှာတော့ သံတမန်ရေးအရ ညှိနှိုင်းမှုတွေ အဆက်မပြတ် ဆောင်ရွက်ရင်း တပ်တွေ တဖြည်းဖြည်း ပြန်လျှော့ဖို့ သဘောတူခဲ့ကြပါတယ်။
အိန္ဒိယနဲ့ တရုတ်တို့ဟာ နယ်စပ် အငြင်းပွားမှုတွေကြောင့် စစ်ပွဲတစ်ကြိမ် ဖြစ်ပွားခဲ့ဖူးပြီး အဲဒီနောက်ပိုင်း နယ်စပ်မှာ တပ်တွေ ချထားပေမယ့် သေနတ်မဖောက်ကြဖို့ ညှိနှိုင်းထားခဲ့ကြပါတယ်။ ဒါကြောင့် တပ်တွေ အချင်းချင်း ခိုက်ရန် ဖြစ်ပွားရင်လည်း သေနတ်နဲ့ မပစ်ဘဲ တုတ်တွေ၊ ဓားတွေ၊ တင်းပုတ်လိုမျိုး လက်နက်တွေနဲ့သာ သတ်ပုတ်လေ့ ရှိကြပါတယ်။
အခုအခါမှာတော့ တရုတ်ရော၊ အိန္ဒိယပါ ဟိမဝန္တာ အနောက်ခြမ်း နယ်စပ်ဧရိယာက တပ်တွေကို သိသိသာသာ စတင် လျှော့ချနေကြပြီလို့ အိန္ဒိယ အစိုးရက အတည်ပြုပါတယ်။ ဒီထုတ်ပြန်ချက်ဟာ လာမယ့် သီတင်းပတ်၊ ဥဇဘက်ကစ္စတန်မှာ တရုတ် သမ္မတ ရှီကျင့်ဖျင်နဲ့ အိန္ဒိယ ဝန်ကြီးချုပ် နာယန်ဒရာ မိုဒီတို့ နှစ်ဦးလုံး တက်ရောက်မယ့် အစည်းအဝေး တစ်ခု မတိုင်ခင်မှာ ထွက်ပေါ်လာတာပါ။ အဲဒီ အစည်းအဝေးမှာ မိုဒီနဲ့ ရှီတို့ တွေ့ဆုံဖြစ်မလား ဆိုတာကိုတော့ အတိအကျ မသိရသေးပါဘူး။
နယ်စပ်မှာ တပ်တွေ လျှော့ချနေကြောင်း အိန္ဒိယဖက်က ကြေညာပေမယ့် နယူးဒေလီ အခြေစိုက် တရုတ်သံရုံးကတော့ ဒီကိစ္စအပေါ် ဘာမှတ်ချက်မပေးသေးပါဘူး။ အိန္ဒိယနဲ့ တရုတ်တို့ဟာ ကီလိုမိတာ ၃၈၀၀ လောက် ရှည်လျားတဲ့ နယ်စပ်ကို မျှဝေထားပါတယ်။
၂၀၂၀ ပြည့်နှစ်မှာ ဖြစ်ပွားတဲ့ သွေးမြေကျ ပဋိပက္ခတွေအပြီး အိန္ဒိယဟာ လာဒက်ခ်ဒေသကို စစ်သည် ၅ သောင်းလောက် အားဖြည့် ပို့ဆောင်ခဲ့ပါတယ်။ တရုတ်ကလည်း အရေအတွက် မထုတ်ပြန်ပေမယ့် ပင်လယ်ရေမျက်နှာပြင်အထက် ပေ ၁၅၀၀၀ ကျော် မြင့်မားတဲ့ နယ်စပ်တလျှောက်ကို တပ်ဖွဲ့ဝင်တွေ အလုံးအရင်း စေလွှတ်ထားခဲ့ကြောင်း သိရပါတယ်။
