Twitterပေါ်မှာ မကြာခဏ အာချောင်လေ့ရှိတဲ့ သားဖြစ်သူကို ယူဂန္ဓာ သမ္မတက ကြည်းတပ် စစ်ဦးစီး ရာထူးကနေ ဖယ်ရှားလိုက်ပါတယ်။
ယူဂန္ဓာ စစ်တပ်က ဗိုလ်ချုပ် မူဟူဇီ ကိုင်နီရူဂါဘာဟာ ကြယ်လေးပွင့် ဗိုလ်ချုပ်ကြီးအဖြစ် ရာထူးတိုးသွားပြီး သမ္မတ ယိုဝီရီ မူဆယ်ဗန်နီရဲ့ စစ်ရေးအကြံပေး အရာရှိအနေနဲ့ ပြောင်းလဲ ခန့်အပ် ခံခဲ့ရကြောင်း ကြေညာသွားပါတယ်။ ရာထူးတိုးသွားတယ် ဆိုပေမယ့်လည်း ကိုင်နီရူဂါဘာဟာ ယူဂန္ဓာ စစ်တပ် ဖွဲ့စည်းပုံအရ တပ်တွင်းဩဇာ အညောင်းဆုံးလို့ ဆိုရမယ့် ကြည်းတပ် စစ်ဦးစီး ရာထူးကိုတော့ လက်လွှတ်လိုက်ရပါတယ်။
ဒီလို အခြေအနေတွေ ဖြစ်လာရတာကတော့ ကိုင်နီရူဂါဘာက Twitterပေါ်မှာ ပြက်ချော်ချော် သဘောမျိုးနဲ့ အငြင်းပွားစရာတွေ မကြာခဏ ရေးသားခဲ့တာကြောင့်ပါပဲ။ သူရေးတာတွေက အတည်ယူလို့ မရပေမယ့် နိုင်ငံတစ်နိုင်ငံရဲ့ အဓိက စစ်ဦးစီး တစ်ယောက်အနေနဲ့တော့ ပြဿနာတွေ ရှိပါတယ်။ နောက်ပြီး ယူဂန္ဓာ စစ်တပ်ထဲက တခြားတစ်ယောက်ယောက်သာ ဒါမျိုးတွေ ရေးနေရင် စစ်ခုံရုံး ရောက်နေလောက်ပြီလို့လည်း တချို့က ထောက်ပြပါတယ်။
ကိုင်နီရူဂါဘာ လျှောက်ရေးတဲ့ထဲမှာ အာဖရိကတိုက် တစ်တိုက်လုံးက ယူကရိန်း စစ်ပွဲမှာ ရုရှားကို ထောက်ခံပါတယ် ဆိုတာမျိုးတွေ၊ ကွန်ဂို အရှေ့ခြမ်းက အကြမ်းဖက် သူပုန်အဖွဲ့တွေကို ထောက်ခံသင့်တယ် ဆိုတာမျိုးတွေ ပါဝင်ပါတယ်။ မကြာသေးခင်ကတင် အီတလီမှာ ရွေးကောက်ပွဲ အနိုင်ရလာတဲ့ အမျိုးသမီး ဝန်ကြီးချုပ်လောင်းကို နွားအကောင် ၁၀၀ နဲ့ တင်တောင်းပြီး လက်ထပ်ချင်တယ် ဆိုတာမျိုးလည်း သူက ရေးခဲ့ဖူးပါတယ်။
ဒါပေမဲ့ အိမ်နီးချင်း ကင်ညာနိုင်ငံကို ကျူးကျော် သိမ်းပိုက်မယ် ဆိုတာမျိုး အရေးအသားတွေကျတော့ ဖခင်ဖြစ်သူ အနေနဲ့ ရှေ့လျှောက် ဆက်ပြီး လွှတ်ထားလို့ မရတော့ပါဘူး။ ဒါကြောင့်လည်း သူ့ရဲ့ တပ်တွင်း ဩဇာကြီးမားတဲ့ ရာထူးနေရာကနေ ဖယ်ရှားပြီး စစ်ရေး အကြံပေးအဖြစ် အနားခေါ်ထားလိုက်ရတဲ့ သဘောပါပဲ။ ကိုင်နီရူဂါဘာကတော့ သူဟာ နောက်ပြောင်ပြီး လျှောက်ရေးနေတာပါလို့ ပြောပေမယ့် ကင်ညာမှာရော၊ ယူဂန္ဓာမှာပါ အတော်ကြီး ပြင်းထန်တဲ့ ဝေဖန်မှုတွေ ရှိခဲ့ပါတယ်။
မူဆယ်ဗန်နီဟာ ၁၉၈၆ ခုနှစ် ကတည်းက ယူဂန္ဓာ အစိုးရကို ဦးဆောင်နေခဲ့သူဖြစ်ပြီး မကြာသေးမီကမှ အာဏာရလာတဲ့ ကင်ညာ သမ္မတ ဝီလျံရူတိုနဲ့လည်း ရင်းနှီးပါတယ်။ သူ့သားရဲ့ ကပျက်ကချော် လုပ်ရပ်တွေကြောင့် နှစ်နိုင်ငံကြား မျက်နှာနာစရာ ဖြစ်လာချိန်မှာ မူဆယ်ဗန်နီ အနေနဲ့ ထင်ရှားမြင်သာတဲ့ အရေးယူမှု တစ်ခုကို ပြသလိုက်ရတဲ့ သဘောပါပဲ။ ကိုင်နီရူဂါဘာဟာ ရာထူး မတိုးခင် အချိန်ထိ ယူဂန္ဓာ စစ်တပ် တစ်ခုလုံးရဲ့ အမှန်တကယ် လုပ်ပိုင်ခွင့် ဩဇာ အရှိဆုံးသူလို့ သတ်မှတ် ခံရပြီး တစ်ချိန်မှာ ဖခင်ရဲ့ သမ္မတ အရိုက်အရာကိုပါ ဆက်ခံမယ့်သူလို့ ထင်ကြေးပေး ခံခဲ့ရပါတယ်။
