ကျောက်ကပ် ပျက်စီးမှုတွေကြောင့် ကလေး ၁၀၀ နီးပါး သေဆုံးခဲ့တဲ့ ဖြစ်စဉ်အပြီး အင်ဒိုနီးရှားဟာ ချောင်းဆိုးပျောက်ဆေးနဲ့ တခြားသောက်ဆေးရည်တွေ အားလုံးကို ပြည်တွင်းမှာ ရောင်းချခွင့် ဆိုင်းငံ့ထားလိုက်ပါတယ်။
အင်ဒိုနီးရှား ကျန်းမာရေး ဝန်ကြီးဌာနက သောက်ဆေးရည်တွေ ရောင်းချခွင့် ပိတ်ပင်ကြောင်း အမိန့်ကို အခုသီတင်းပတ်မှာ ထုတ်ပြန် ကြေညာလိုက်ပါတယ်။ ပြည်တွင်းမှာ ဆိုးရွားတဲ့ ကျောက်ကပ် ပျက်စီးမှုတွေကြောင့် ကလေး ၉၉ ဦးထက်မနည်း သေဆုံးခဲ့တဲ့နောက် အခုလိုမျိုး အရေးပေါ် တုံ့ပြန်မှုတွေ စတင် ဆောင်ရွက်ခဲ့ရတာဖြစ်ကြောင်း ကျန်းမာရေး ဝန်ကြီးဌာန ပြောရေးဆိုခွင့်ရ အရာရှိ မိုဟာမက် ရှာရီလ်က ပြောပါတယ်။
အင်ဒိုနီးရှား ကျန်းမာရေး အာဏာပိုင်တွေဟာ စျေးကွက်ထဲ ပျံ့နှံ့နေတဲ့ မှတ်ပုံတင်မထားတဲ့ သောက်ဆေးတွေထဲမှာ ကျောက်ကပ် ထိခိုက်စေနိုင်တဲ့ အဆိပ်အတောက် ပစ္စည်းတွေ ပါဝင်နေသလား ဆိုတာကို ဓာတ်ခွဲ စစ်ဆေးမှုတွေ ပြုလုပ်သွားမှာပါ။ လက်ရှိ အချိန်ထိ အသက် ၆ နှစ်အောက် အရွယ်တွေ အများစု အပါအဝင် ကလေး ၂၀၆ ဦးဟာ ပြင်းထန်တဲ့ ကျောက်ကပ် ထိခိုက်မှုတွေ ကြုံတွေ့ခဲ့ပြီး ၉၉ ဦး အသက်ဆုံးရှုံးခဲ့တယ်လို့ ရှာရီလ်က ဆိုပါတယ်။
ဖြစ်စဉ်တွေနဲ့ ပတ်သက်လို့ ကြိုတင် သတိထား တုံ့ပြန်တဲ့ အနေနဲ့ ဆေးဆိုင် အားလုံးမှာ သောက်ဆေးရည်တွေ လောလောဆယ် မရောင်းဖို့ မေတ္တာရပ်ခံထားကြောင်း သူက အတည်ပြုပါတယ်။
အစောပိုင်းမှာ ကမ္ဘာ့ကျန်းမာရေး အဖွဲ့ကြီး (WHO)က ဂမ်ဘီယာမှာ သောက်ဆေးတွေကြောင့် ကလေး ၇၀ လောက် ကျောက်ကပ် ပျက်စီးပြီး သေဆုံးခဲ့တဲ့ ဖြစ်ရပ်ကို အတည်ပြု ကြေညာခဲ့ပါသေးတယ်။ ကလေးတွေ သေဆုံးခဲ့မှုဟာ အိန္ဒိယ ကုမ္ပဏီ တစ်ခုက ထုတ်လုပ်တဲ့ ချောင်းဆိုးနဲ့ အဖျားပျောက် ဆေးရည် ၄ မျိုးနဲ့ ဆက်စပ်တယ်လို့ ယုံကြည်ရကြောင်း WHOက ထုတ်ပြန်ခဲ့ပါတယ်။
ဒါပေမဲ့ ဂမ်ဘီယာကို တင်ပို့နေပြီး WHOက အသုံးပြုခွင့် ဆိုင်းငံ့စေခဲ့တဲ့ ဆေး ၄ မျိုးကို ပြည်တွင်းမှာ ရောင်းချနေတာတော့ မရှိဘူးလို့ အင်ဒိုနီးရှား အစားအသောက်နဲ့ ဆေးဝါး ကွပ်ကဲရေး အေဂျင်စီက ပြောပါတယ်။
ကနဦး တွေ့ရှိချက်တွေအရတော့ အင်ဒိုနီးရှားက နာမကျန်း ဖြစ်တဲ့ ကလေးငယ်တွေရဲ့ အိမ်တွေမှာ အသုံးပြုတဲ့ ချောင်းဆိုးပျောက် ဆေးရည်တွေမှာ ethylene glycolနဲ့ diethylene glycol ဓာတ်ပစ္စည်းတွေ ရောနှော ပါဝင်နေတာကို အင်ဒိုနီးရှား အာဏာပိုင်တွေက စိစစ် တွေ့ရှိထားပါတယ်။ အဲဒီ ဓာတ်ပစ္စည်းတွေဟာ သုတ်ဆေး၊ ပလပ်စတစ်နဲ့ အလှကုန်လို ပစ္စည်းတွေ ထုတ်လုပ်ရာမှာ အသုံးဝင်ပြီး ချောင်းဆိုးပျောက်ဆေးထဲမှာ မရှိသင့်ကြောင်း အင်ဒိုနီးရှား ကျန်းမာရေးဝန်ကြီး ဘူဒီ ဂူနာဒီ ဆာဒီကင်က ပြောကြားထားပါတယ်။
