ကျောက်ကပ်ပျက်စီးလို့ ကလေးငယ် ၁၄၀ ကျော် သေဆုံးခဲ့တဲ့ ဖြစ်စဉ်အပြီး ဒီကိစ္စအတွက် တာဝန်ရှိတဲ့ ဆေးကုမ္ပဏီတွေကို ဖော်ထုတ် တရားစွဲဆိုဖို့ အင်ဒိုနီးရှား အာဏာပိုင်တွေက စီစဉ်နေပါတယ်။
အင်ဒိုနီးရှားမှာ ဒီနှစ်အတွင်း ၅ နှစ်အောက် အရွယ်တွေ အများစု အပါအဝင် ကလေး ၁၄၁ ဦးထက် မနည်းဟာ ပြင်းထန် ကျောက်ကပ်ပျက်စီးမှု အခြေအနေ (AKI)ကြောင့် အသက်ဆုံးရှုံးခဲ့ပါတယ်။ အဲဒီလို ကလေးတွေ သေဆုံးရတဲ့ အဓိက အကြောင်းရင်းဟာ ကလေးတွေအတွက် ထုတ်လုပ်ထားတဲ့ ချောင်းဆိုးပျောက်ဆေးနဲ့ သောက်ဆေး အမျိုးအစား တချို့မှာ အဆိပ်အတောက် ဖြစ်စေတဲ့ ဓာတ်ပစ္စည်းတွေ ရောနှောနေတာကြောင့်လို့ တာဝန်ရှိသူတွေက ယူဆနေပါတယ်။
အခုအခါ အင်ဒိုနီးရှား အစားအသောက်နဲ့ ဆေးဝါး ကွပ်ကဲရေး ဌာန (BPOM)က ပြည်တွင်းမှာ သောက်ဆေးအရည် ရောင်းချမှုတွေကို ယာယီ ပိတ်ပင်ထားပြီး မှတ်ပုံမတင်ဘဲ စျေးကွက်ဖြန့်နေတဲ့ ဆေးဝါးတွေကို ဓာတ်ခွဲ စစ်ဆေးနေပါတယ်။ ကနဦး တွေ့ရှိချက်တွေအရ ဒိုင်အီသိုင်လင်း ဂလိုင်ကောနဲ့ အီသိုင်လင်း ဂလိုင်ကော ဓာတ်ပစ္စည်းတွေ ရောပါနေတဲ့ သောက်ဆေးရည်တွေကြောင့် ကလေးတွေ ကျောက်ကပ် ပျက်စီးခဲ့တာလို့ ယူဆကြောင်း ကျန်းမာရေး ဝန်ကြီးဌာနက ထုတ်ပြန်ထားပါတယ်။
အခုဆိုရင် AKIကြောင့် သေဆုံးသူ ကလေးငယ် ၁၄၁ ဦးထိ အတည်ပြု တွေ့ရှိထားပြီး ကလေးတွေ သောက်ခဲ့တဲ့ ဆေးတွေထဲမှာ အထက်ပါ ဓာတ်ပစ္စည်းတွေ ရောနှော ပါဝင်နေတယ်ဆိုတဲ့ အထောက်အထားတွေလည်း ရရှိထားပါတယ်။
အခုအခါ ဒီကိစ္စနဲ့ ပတ်သက်လို့ ဆေးကုမ္ပဏီ နှစ်ခုကို တရားစွဲဆိုဖို့ အစိုးရ ရှေ့နေတွေက ဆွေးနွေး ပြင်ဆင်နေကြောင်း ရဲတပ်ဖွဲ့က ပြောပေမယ့် ကုမ္ပဏီ နှစ်ခုရဲ့ နာမည်တွေကိုတော့ မထုတ်ပြန်ပါဘူး။ BPOMရဲ့ အကြီးအကဲ ပန်နီ ကေ လူကီတိုက ရဲတပ်ဖွဲ့ရဲ့ စုံစမ်းစစ်ဆေးမှုတွေကို ဌာနကလည်း ပူးပေါင်း ကူညီသွားမယ်လို့ ပြောပါတယ်။ လောလောဆယ် သေချာတာ တစ်ခုက ကလေးတွေအတွက် ထုတ်လုပ်ထားတဲ့ သောက်ဆေးရည် တချို့မှာ မပါဝင်သင့်တဲ့၊ အဆိပ်အတောက် ဖြစ်နိုင်တဲ့ ဓာတ်ပစ္စည်းတွေ ရောနှောနေခဲ့တာ ဖြစ်တယ်လို့ ပန်နီက ဆိုပါတယ်။
အာဖရိကတိုက်က ဂမ်ဘီယာ နိုင်ငံမှာလည်း အလားတူ အကြောင်းရင်းကြောင့်ပဲ ကလေးငယ် ၇၀ လောက် ကျောက်ကပ်ထိခိုက် သေဆုံးခဲ့ကြောင်း ကမ္ဘာ့ကျန်းမာရေး အဖွဲ့ကြီး (WHO)ကလည်း ကြေညာဖူးပါတယ်။ ဂမ်ဘီယာက ဖြစ်စဉ်မှာတော့ အိန္ဒိယ ကုမ္ပဏီ တစ်ခုက တင်ပို့တဲ့ ဆေး ၄ မျိုးမှာ ဒိုင်အီသိုင်လင်း ဂလိုင်ကောနဲ့ အီသိုင်လင်း ဂလိုင်ကော ဓာတ်ပစ္စည်းတွေ ရောနှောပါဝင်ခဲ့ကြောင်း စစ်ဆေး ဖော်ထုတ်နိုင်ခဲ့ပါတယ်။ ဒါပေမဲ့ အဲဒီ ဆေး ၄ မျိုးကို အင်ဒိုနီးရှားဆီ တင်ပို့ရောင်းချနေတာမျိုးတော့ မရှိဘူးလို့ သိရပါတယ်။
