ဘရာဇီးက နိုင်ငံရေးသမား တစ်ဦးဟာ သူ့ကို လာရောက် ဖမ်းဆီးတဲ့ ရဲတွေကို လက်ပစ်ဗုံးနဲ့ ပစ်ပေါက်ပြီး ခုခံခဲ့ကြောင်း သိရပါတယ်။
ရောဘတ်တို ဂျက်ဖာဆင်ဟာ လက်ယာစွန်း ဝါဒစွဲ လက်ရှိ သမ္မတ ဂျဲရ် ဘော်လ်ဆိုနာရိုရဲ့ မဟာမိတ် တစ်ယောက်လည်း ဖြစ်ပါတယ်။ အောက်တိုဘာ ၂၃ ရက်မှာတော့ ရဲတပ်ဖွဲ့ဝင်တွေက ရီယိုဒီဂျနေရိုးမြို့မှာရှိတဲ့ နေအိမ်မှာ ဂျက်ဖာဆင်ကို ဖမ်းဆီးဖို့ သွားရောက်ခဲ့ပါတယ်။
ဂျက်ဖာဆင်က ရဲတွေကို လက်ပစ်ဗုံးတွေနဲ့ တုံ့ပြန် တိုက်ခိုက်ခဲ့တာကြောင့် ရဲနှစ်ဦး ဒဏ်ရာရသွားခဲ့ပါတယ်။ အဲဒီနောက်ပိုင်း ရဲတပ်ဖွဲ့က အပြင်းအထန် အင်အားသုံးတော့မယ်လို့ သတိပေးတော့မှ ဂျက်ဖာဆင်က လက်နက်ချ အဖမ်းခံခဲ့ပါတယ်။
ဂျက်ဖာဆင်ဟာ တရားသူကြီးချုပ် ကာမန် လူစီရာကို စော်ကားမော်ကား ပြုမူခဲ့ကြောင်း ဆုံးဖြတ်ပြီး သူ့ကို ဖမ်းဆီးဖို့ တရားရုံးချုပ် တရားသူကြီး တစ်ဦးက ညွှန်ကြားခဲ့ပါတယ်။ ဂျက်ဖာဆင်ဟာ ဒီကိစ္စကြောင့် နေအိမ် အကျယ်ချုပ် ချုပ်ခံထားရပြီး ဖြစ်ပေမယ့် နောက်တစ်ကြိမ် ထပ်ပြီး ပြဿနာ ရှာပြန်တာကြောင့် ရဲတွေက သူ့ကို သွားဖမ်းတာပါ။
ရဲတွေက နေအိမ်ထဲ ဝင်ရောက်ချိန်မှာ အသက် ၆၉ နှစ်အရွယ် ဂျက်ဖာဆန်က လက်ပစ်ဗုံးတွေနဲ့ ပြန်ပစ်ပေါက်ခဲ့ပါတယ်။ လက်ပစ်ဗုံး ပေါက်ကွဲလို့ ရဲကားတစ်စီး ပျက်စီးခဲ့သလို ရဲနှစ်ဦးလည်း ဗုံးအစအနတွေ ထိမှန် ခံခဲ့ရပါတယ်။ ရဲနှစ်ယောက်ကို ဆေးရုံ တင်ပို့ခဲ့ပေမယ့် ဒဏ်ရာ သိပ်မပြင်းတာကြောင့် နောက်တစ်နေ့မှာ ပြန်ဆင်းခွင့် ပြုလိုက်ပါတယ်။
ဂျက်ဖာဆင်ဟာ PTB နိုင်ငံရေး ပါတီရဲ့ အကြီးအကဲဟောင်းဖြစ်ပြီး တဇွတ်ထိုး လုပ်တတ်တဲ့ ညာဉ်ကြောင့်လည်း လူသိများပါတယ်။ သူဟာ ရဲတွေကို လက်ပစ်ဗုံးတွေနဲ့ ပေါက်တဲ့အပြင် ရိုင်ဖယ်သေနတ် တစ်လက်နဲ့ အချက်ရေတချို့ လှမ်းပစ်ခဲ့သေးတယ်လို့လည်း ဆိုပါတယ်။
ဘော်လ်ဆိုနာရိုကတော့ သူ့ရဲ့ နိုင်ငံရေး မဟာမိတ်ကို တိုက်ရိုက် ဝေဖန်ပြစ်တင်တာမျိုး မလုပ်ပေမယ့် ရဲတွေကို ကိုယ်ထိလက်ရောက် ရန်မူတဲ့သူ ဘယ်သူမဆို ဥပဒေအရ ဖမ်းဆီး အရေးယူ ခံရမှာဖြစ်ကြောင်း ပြောကြားသွားပါတယ်။
