သေနတ်သမား တစ်ဦးရဲ့ ပစ်ခတ်မှုကြောင့် ပါကစ္စတန် ဝန်ကြီးချုပ် အင်မ်ရန်ခန်းဟာ ဒဏ်ရာ အနည်းငယ် ရရှိသွားတယ်လို့ သိရပါတယ်။
နိုဝင်ဘာ ၃ ရက်က ခန်းဟာ နိုင်ငံရေး ဟောပြောပွဲ တစ်ခုအတွက် စီတန်းလှည့်လည်တဲ့ ထရပ်ကားပေါ်မှာ ရှိနေတုန်း သေနတ်နဲ့ အပစ်ခံရကြောင်း ရဲတွေက ပြောပါတယ်။ ဒီဖြစ်စဉ်မှာ နောက်ထပ် လူ ၄ ဦးထက်မနည်းလည်း ဒဏ်ရာတွေ ရခဲ့ပါတယ်။
ခန်းကို အားပေးထောက်ခံသူတွေက ဒါဟာ ဝန်ကြီးချုပ်ဟောင်းကို ပစ်မှတ်ထားတဲ့ လုပ်ကြံမှု တစ်ခုလို့ စွပ်စွဲပေမယ့် ရဲတွေကတော့ အဓိက ပစ်မှတ်ဟာ ခန်းဟုတ်မဟုတ် အတည်မပြုသေးပါဘူး။ ခန်းဟာ ညို့သကျည်းမှာ ကျည်ဆန်ထိမှန်ခဲ့တယ်လို့ သိရပါတယ်။ နောက်ပိုင်းမှာ သံသယတရားခံ အမျိုးသား တစ်ဦးကို ဖမ်းဆီးရမိကြောင်း ရဲတပ်ဖွဲ့က ကြေညာပါတယ်။
ပါကစ္စတန် အရှေ့ပိုင်း၊ ပန်ဂျပ်ပြည်နယ်က ဝါဇီရာဘက်မြို့မှာ ကျည်ဆန်ထိမှန် ဒဏ်ရာရခဲ့တဲ့ ခန်းကို အနားမှာရှိတဲ့ မြို့ကြီးတစ်ခုဖြစ်တဲ့ ပန်ဂျပ်က ဆေးရုံဆီ ပို့ဆောင်ပေးထားလိုက်ပါတယ်။ သူ့ရဲ့ PTI ပါတီက တာဝန်ရှိသူတွေက ခန်းရဲ့ အခြေအနေက တည်တည်ငြိမ်ငြိမ် ရှိနေတယ်လို့ ပြောပါတယ်။ အသက် ၇၀ အရွယ် ဝန်ကြီးချုပ်ဟောင်းဟာ သတိကောင်းကောင်း ရနေပြီး ဒဏ်ရာက သိပ်မပြင်းဘူးလို့လည်း သိရပါတယ်။
အခင်းဖြစ်ချိန်က ခန်းဟာ ထရပ်ကားတွေ စီတန်း မောင်းနှင်ပြီး မြို့တော် အစ္စလာမ်မာဘတ်ဆီ ဦးတည်တဲ့ ယာဉ်တန်းပေါ်မှာ လိုက်ပါလာနေခဲ့တာ ဖြစ်ပါတယ်။ ဒါဟာ ရွေးကောက်ပွဲ အချိန်စော ကျင်းပဖို့ လက်ရှိ အစိုးရအပေါ် ဖိအားပေးနေတဲ့ သူ့ရဲ့ နိုင်ငံရေး လှုပ်ရှားမှု အစိတ်အပိုင်း တစ်ရပ်ပါ။
လက်ရွေးစင် ခရစ်ကက် ကစားသမား ဘဝကနေ နိုင်ငံရေး နယ်ပယ်ထဲ ကူးပြောင်းလာတဲ့ ခန်းဟာ ပါကစ္စတန် နိုင်ငံသမိုင်းမှာ အယုံအကြည်မရှိ အဆိုနဲ့ ရာထူးက ဖယ်ရှားခံရတဲ့ ပထမဆုံး ဝန်ကြီးချုပ်အဖြစ် မှတ်တမ်းဆိုး ရှိခဲ့သူပါ။ ဧပြီလတုန်းက သူ့ရဲ့ စီးပွားရေးဆိုင်ရာ မူဝါဒတွေအပေါ် အယုံအကြည် မရှိဘူးဆိုတဲ့ အကြောင်းပြချက်နဲ့ အယုံအကြည်မရှိ အဆိုတင်သွင်းခံရပြီး ရာထူးက ဖယ်ရှားခံခဲ့ရတာ ဖြစ်ပါတယ်။
ဒါပေမဲ့ ခန်းကတော့ သူဟာ မူလရာထူးကို အရပြန်ယူဖို့ ဘယ်တော့မှ လက်လျှော့မှာ မဟုတ်ကြောင်း ပြောကြားထားပါတယ်။ ပြီးခဲ့တဲ့လမှာ ပါကစ္စတန် ရွေးကောက်ပွဲ ကော်မရှင်က ခန်းကို နောက်ထပ် ၅ နှစ် လွှတ်တော်ထဲ ပြန်ဝင်ခွင့် မရအောင် တားမြစ်မယ့် အဆိုပြုချက်ကို ထောက်ခံကြောင်း ကြေညာပေမယ့် ခန်းကတော့ ဒါဟာ နိုင်ငံရေးအရ အောက်လမ်းနည်းနဲ့ ထိုးနှက်တာလို့ စွပ်စွဲထားပြီး လက်ရှိ အစိုးရအပေါ် ဆက်လက် ဖိအားပေးဖို့ ဆုံးဖြတ်ခဲ့ပါတယ်။
ခန်းက အခုလို ပစ်ခတ်မှု ခံရတယ် ဆိုတာကလည်း ပါကစ္စတန်ရဲ့ နိုင်ငံရေး မတည်ငြိမ်မှုတွေ ကြီးထွားလာမှုကို ပိုပြီး မြင်သာစေပါတယ်။ လက်ရှိ အခြေအနေတွေအရ အာဏာရ အစိုးရ အဖွဲ့ရော၊ ခန်းဦးဆောင်တဲ့ နိုင်ငံရေး အင်အားစုကပါ အလျှော့မပေးကြလို့ အခြေအနေတွေက ပိုပြီး ရှုပ်ထွေးနေပါတယ်။ ပါကစ္စတန် နိုင်ငံရေးမှာ ဩဇာကြီးမားတဲ့ စစ်တပ်ကတော့ ခန်းအနေနဲ့ ဒီမိုကရေစီ အခွင့်အရေးတွေအရ အစ္စလာမ်မာဘတ်မှာ လူထု စုဝေးပွဲတွေ ကျင်းပခွင့် ရှိပေမယ့် ဘယ်အဖွဲ့အစည်းကမှ နိုင်ငံ တည်ငြိမ်မှု ပျက်ပြားအောင် လုပ်ဆောင်ခွင့်ပြုမှာ မဟုတ်ဘူးလို့ သတိပေးထားပါတယ်။
