အိန္ဒိယ နိုင်ငံရဲ့ ပထမဆုံး မဲပေးသူအဖြစ် သတ်မှတ်ခံရတဲ့ အမျိုးသားကြီးဟာ အသက် ၁၀၅ နှစ် အရွယ်မှာ ကွယ်လွန်သွားကြောင်း သိရပါတယ်။
ဗြိတိသျှ ကိုလိုနီ ဘဝကနေ လွတ်လပ်ရေး ရလာပြီး ပထမဆုံးအကြိမ် ကျင်းပတဲ့ ရွေးကောက်ပွဲမှာ အစောဆုံး မဲပေးသူ အနေနဲ့ ရှာယမ် ဆာရန် နက်ဂီက မှတ်တမ်းဝင်ထားပါတယ်။ အဲဒီအချိန်ကစလို့ နက်ဂီဟာ ကျင်းပခဲ့သမျှ အိန္ဒိယ ရွေးကောက်ပွဲတိုင်းမှာ မပျက်မကွက် မဲပေးခဲ့ပါတယ်။
သူဟာ နိုဝင်ဘာ ၅ ရက်မှာ ကွယ်လွန်ခဲ့ပြီး အဲဒီမတိုင်ခင် ၃ ရက် အလိုကတင် ဟင်မာချယ်လ် ပရာဒက်ရှ် ပြည်နယ်က လွှတ်တော် ရွေးကောက်ပွဲအတွက် သွားရောက် မဲပေးခဲ့ပါသေးတယ်။ နက်ဂီဟာ ရွေးကောက်ပွဲတွေမှာ စဉ်ဆက်မပြတ် မဲပေးခဲ့တယ်ဆိုတဲ့ သူ့ရဲ့ ဖြတ်သန်းမှုကို အရမ်းဂုဏ်ယူလေ့ ရှိတယ်လို့လည်း ဆိုပါတယ်။
အိန္ဒိယမှာ လွတ်လပ်ရေး ရပြီးနောက် ၁၉၅၂ ခုနှစ်မှာ ပထမဆုံးအကြိမ် ရွေးကောက်ပွဲ ကျင်းပခဲ့ပါတယ်။ ဒါပေမဲ့ နက်ဂီနေထိုင်တဲ့ ပြည်နယ်က အဲဒီအချိန်မှာ အရမ်းနှင်းကျလေ့ ရှိတာကြောင့် ၅ လစောပြီး ၁၉၅၁ ခုနှစ်မှာ ရွေးကောက်ပွဲ ကြိုတင် ကျင်းပစေခဲ့ပါတယ်။ အဲဒီတုန်းက နက်ဂီဟာ အစောဆုံး မဲသွားပေးသူ ဖြစ်ခဲ့ပါတယ်။ အဲဒီခေတ် ရွေးကောက်ပွဲမှာ အိန္ဒိယ အမျိုးသား ကွန်ဂရက်က သောင်ပြိုကမ်းပြို ရလဒ်နဲ့ အနိုင်ရခဲ့ပြီး ဂျာဝါဟာလာ နေရူးက အိန္ဒိယရဲ့ ပထမဆုံး ရွေးကောက်ခံ ဝန်ကြီးချုပ် ဖြစ်လာခဲ့ပါတယ်။
အခုသီတင်းပတ် အစောပိုင်းက ရွေးကောက်ပွဲ ကော်မရှင် အရာရှိတွေဟာ နိုဝင်ဘာ ၁၂ ရက် ရွေးကောက်ပွဲ မတိုင်ခင် ကြိုတင်မဲ သွားပေးခဲ့တဲ့ နက်ဂီကို ကော်ဇောနီခင်းပြီး အမှတ်တရ ဂုဏ်ပြုပေးခဲ့ကြပါတယ်။ နက်ဂီဟာ ကျန်းမာရေး အတော်ဆိုးနေတဲ့အတွက် ပထမဆုံးအကြိမ် မဲရုံကို ကိုယ်တိုင် မသွားရောက်ဖို့ ဆုံးဖြတ်ခဲ့ပြီး ကြိုတင်မဲ သွားပေးခဲ့တာလို့ အိန္ဒိယ မီဒီယာတွေက ဖော်ပြပါတယ်။
၂၀၁၄ တုန်းက အိန္ဒိယ ရွေးကောက်ပွဲ ကော်မရှင်ဟာ နက်ဂီကို ကော်မရှင်ရဲ့ သံအမတ် အနေနဲ့ ခန့်အပ်ခဲ့ဖူးပါတယ်။ နက်ဂီက မဲပေးခြင်းဟာ ဒီမိုကရေစီ လုပ်ငန်းစဉ်ရဲ့ အလေ့အကျင့်ကောင်း ဖြစ်တာကြောင့် နောင်လာနောက်သား လူငယ်တွေလည်း မပျက်မကွက် လက်ဆင့်ကမ်းပြီး သေသေချာချာ မဲပေးစေချင်တယ်လို့ တိုက်တွန်းခဲ့ဖူးပါတယ်။
အိန္ဒိယ ဝန်ကြီးချုပ် နာယန်ဒရာ မိုဒီဟာ သူ့ရဲ့ မဲဆွယ်မိန့်ခွန်းကို ပြောကြားချိန်မှာ ကွယ်လွန်သူ နက်ဂီကို ထည့်သွင်း ဂုဏ်ပြုသွားခဲ့ပါတယ်။ နက်ဂီရဲ့ ကြွင်းကျန် ရုပ်အလောင်းကို ပြည်နယ် အစိုးရရဲ့ ဂုဏ်ပြု အစီအစဉ်နဲ့ သူ့ဇာတိကျေးရွာ ကယ်လ်ပါမှာ မီးသင်္ဂြိုဟ်သွားမှာ ဖြစ်ပါတယ်။
