ရုရှားနိုင်ငံမှာ အရက်မူးနေသူ တစ်ယောက်က လက်ဆော့ပြီး မီးကျည်သေနတ် ပစ်ခတ်ရာက နိုက်ကလပ် မီးလောင်ပြီး လူ ၁၃ ဦးထက်မနည်း သေဆုံးခဲ့ပါတယ်။
နိုဝင်ဘာ ၅ ရက် မနက်အစောပိုင်းက ကော်စထရိုမာမြို့မှာ ဖြစ်ပွားတဲ့ မီးလောင်မှုကြောင့် ၁၃ ဦးထက်မနည်း သေဆုံးပြီး ၅ ဦး ဆေးရုံရောက်ခဲ့သလို အနီးပတ်ဝန်းကျင်မှာ နေထိုင်သူ ရာဂဏန်းလောက်ကိုပါ အရေးပေါ် ရွှေ့ပြောင်းစေခဲ့ရကြောင်း အာဏာပိုင်တွေက ပြောပါတယ်။
မျက်မြင်တွေရဲ့ အဆိုအရ အတော်လေး မူးနေဟန်ရှိတဲ့သူ တစ်ယောက်ဟာ နိုက်ကလပ်ရဲ့ လူတွေ စုဝေး ကခုန်ရာ နေရာကို ချိန်ပြီး မီးကျည် သေနတ်နဲ့ လှမ်းပစ်ရာက မီးကူးစက် လောင်ကျွမ်းခဲ့တာလို့ သိရပါတယ်။ မီးက အဆောက်အအုံ မျက်နှာကျက်ကို ခပ်မြန်မြန် ကူးစက်သွားပြီး ထိန်းမနိုင်သိမ်းမရ အဆင့်ထိ ရောက်သွားခဲ့ပါတယ်။
မြို့ခံမီးသတ် တပ်ဖွဲ့ဟာ နိုက်ကလပ်မီးကို ငြှိမ်းသတ်ဖို့အတွက် နာရီပေါင်း အတော်ကြာအောင် အချိန်ယူခဲ့ရပါတယ်။ မီးကျည်သေနတ် ပစ်ခတ်ခဲ့တယ်ဆိုတဲ့ အမျိုးသားကတော့ လောလောဆယ် အဖမ်းခံထားရပါတယ်။
သံသယ တရားခံဟာ အသက် ၂၃ နှစ်အရွယ် လူငယ်တစ်ဦးဖြစ်ပြီး မီးလောင်စေတဲ့ အရာတစ်ခုကို ကလပ်ထဲမှာ အသုံးပြုခဲ့တယ်လို့ အာဏာပိုင်တွေက ပြောပါတယ်။ နိုက်ကလပ်ကို ပိုင်ဆိုင်တဲ့ ကုမ္ပဏီရဲ့ မန်နေဂျာကိုလည်း ရဲတွေက ဖမ်းဆီးထားပါတယ်။
မျက်မြင်တစ်ယောက်က သံသယတရားခံ အမျိုးသားဟာ အမျိုးသမီး တစ်ဦးနဲ့ အတော်လေး အချိန်ဖြုန်းနေပြီး အဲဒီ အမျိုးသမီးအတွက် ပန်းတွေ မှာပေးခဲ့ကြောင်း၊ နောက်တော့ မီးကျည် သေနတ်ကိုယူပြီး ကပွဲကြမ်းပြင်ဖက် လျှောက်သွားရင်း ပစ်ခတ်ခဲ့တာဖြစ်ကြောင်း ပြောပါတယ်။
အခင်းဖြစ်ချိန်က ကလပ်ထဲမှာ လူဘယ်နှယောက် ရှိနေခဲ့သလဲ ဆိုတာတော့ အတိအကျ မသိရသေးပါဘူး။ မီးသတ် တပ်ဖွဲ့တွေကတော့ လူပေါင်း ၂၅၀ လောက်ကို ရွှေ့ပြောင်းပေးရကြောင်း ထုတ်ပြန်ထားပါတယ်။ အဲဒီကလပ်ကို ဒေသခံ နိုင်ငံရေးသမားတစ်ဦး ပိုင်ဆိုင်တယ်လို့လည်း သတင်းတွေက ဖော်ပြပါတယ်။
၂၀၀၉ ခုနှစ်က ရုရှားနိုင်ငံ၊ ပမ်းမြို့မှာ နိုက်ကလပ်တစ်ခု မီးလောင်မှု ဖြစ်ခဲ့ဖူးပြီး အဲဒီတုန်းကတော့ လူပေါင်း ၁၅၉ ဦး အသက်ဆုံးရှုံးခဲ့ပါတယ်။
