မြောက်ကိုရီးယား ခေါင်းဆောင် ကင်မ်ဂျုံအန်းက လက်ဆောင်ပေးခဲ့တဲ့ ခွေးကလေးတွေကို တိရစ္ဆာန်ရုံ တစ်ခုဆီ လွှဲပြောင်းပေးသွားဖို့ တောင်ကိုရီးယား အစိုးရက ဆုံးဖြတ်ခဲ့ပါတယ်။
ခွေးလေးတွေကို ထိန်းသိမ်း စောင့်ရှောက်မှုအတွက် ကုန်ကျမယ့် စရိတ်စကကို ဘယ်သူကျခံသင့်သလဲ ဆိုတာကို လက်ရှိ အစိုးရနဲ့ တောင်ကိုရီးယား သမ္မတဟောင်း မွန်းဂျေအင်းတို့ကြား အငြင်းပွားမှုတွေ ကာလအတန်ကြာ ဖြစ်ပေါ်ခဲ့ရာက အခုလို အပြီးသတ် ဆုံးဖြတ်ချက် ထွက်ပေါ်လာခဲ့တာပါ။
ဂိုမီနဲ့ ဆွန်ဂန်ဆိုတဲ့ Pungsan အမဲလိုက် ခွေးလေး နှစ်ကောင်ကို လွန်ခဲ့တဲ့ ၄ နှစ်က ကိုရီးယား နှစ်နိုင်ငံကြား ဆက်ဆံရေး အတော်လေး ပြန်အဆင်ပြေခဲ့တဲ့ အချိန်မှာ ကင်မ်က (အဲဒီတုန်းက) သမ္မတ မွန်းကို လက်ဆောင်အဖြစ် ပေးအပ်ခဲ့ပါတယ်။
စည်းမျဉ်းတွေအရ တခြားနိုင်ငံ ခေါင်းဆောင် တစ်ဦးက ပေးတဲ့လက်ဆောင် ဖြစ်တာကြောင့် ခွေးလေး နှစ်ကောင်ဟာ တောင်ကိုရီးယား အစိုးရပိုင်အဖြစ် စာရင်းဝင်ခဲ့ပါတယ်။ တောင်ကိုရီးယားမှာ မွန်းရဲ့ သမ္မတ သက်တမ်း ကုန်ဆုံးပြီး လက်ရှိ သမ္မတ ယွန်ဆွတ်ယိုလ် အာဏာရလာတဲ့ အချိန်မှာတော့ ခွေးလေးတွေရဲ့ အုပ်ထိန်းမှုနဲ့ ပတ်သက်လို့ အငြင်းပွားစရာတွေ ရှိလာပါတယ်။
ကနဦးတုန်းက သမ္မတဟောင်း မွန်းကိုပဲ ခွေးလေးတွေရဲ့ အုပ်ထိန်းသူအဖြစ် တာဝန်ယူပေးပြီး ပုံမှန် ထောက်ပံ့ကြေး ပေးနေဖို့ အစိုးရက သဘောတူခဲ့ပေမယ့် နောက်ပိုင်းမှာတော့ သမ္မတယွန်က အဲဒီ သဘောတူညီမှုကို ကန့်ကွက်တဲ့ လက္ခဏာတွေ ပြသလာပါတယ်။ ယွန်ရဲ့ အတွင်းစည်း ပုဂ္ဂိုလ်တချို့က မွန်းဟာ ရယူထားတဲ့ ထောက်ပံ့ကြေးနဲ့ ထိုက်တန်တဲ့ ဂရုစိုက်မှုမျိုးနဲ့ ခွေးလေးတွေကို စောင့်ရှောက် မနေဘူးလို့ ဝေဖန်ခဲ့တဲ့နောက် မွန်းက ပြီးခဲ့တဲ့လမှာ ခွေးလေးတွေကို စွန့်လွှတ်ပြီး အစိုးရဆီ ပြန်လွှဲအပ်ပေးခဲ့ပါတယ်။
နောက်ဆုံးမှာတော့ ခွေးလေးတွေကို နိုင်ငံ အရှေ့တောင်ပိုင်း ဂွမ်ဂျူမြို့က တိရစ္ဆာန်ရုံမှာပဲ နေထိုင်သွားရတော့မယ်လို့ သိရပါတယ်။ ဒီဇင်ဘာ ၁၂ ရက်မှာ နာမည်ရေးထားတဲ့ လည်ပတ် ကိုယ်စီနဲ့ ခွေးလေးတွေကို တိရစ္ဆာန်ရုံမှာ စတင် ပြသခဲ့ပါတယ်။ မြောက်ကိုရီးယားမျိုးရင်း ခွေးလေးတွေကို တိရစ္ဆာန်ရုံမှာ စတင်ပြသတဲ့ အစီအစဉ်ကို သတင်းထောက်တွေနဲ့ ဒေသဆိုင်ရာ အုပ်ချုပ်ရေး အရာရှိတွေပါ တက်ရောက်ခဲ့ပါတယ်။
ခွေးလေးနှစ်ကောင်ဟာ တောင်ကိုရီးယား ရောက်လာတဲ့နောက်ပိုင်း သားသမီး ၆ ကောင်ထိ မွေးဖွားခဲ့ပြီး သူတို့ထဲက ဘိုင်ယိုလ်ဆိုတဲ့ ခွေးထီးလေး တစ်ကောင်ကိုတော့ ၂၀၁၉ ခုနှစ် ကတည်းက ဂွမ်ဂျူ တိရစ္ဆာန်ရုံကို ရောက်နေခဲ့ပါတယ်။ ကျန်တဲ့ ခွေးလေးတွေကတော့ တခြား တိရစ္ဆာန်ရုံတွေနဲ့ တောင်ကိုရီးယားက စောင့်ရှောက်ရေး ဂေဟာတွေဆီ ခွဲဝေ ရောက်ရှိနေပါတယ်။
လောလောဆယ်တော့ ဘိုင်ယိုလ်နဲ့ သူ့မိဘတွေက အချင်းချင်း မမှတ်မိတာကြောင့် သီးသန့် ခွဲထားရပေမယ့် ရေရှည်မှာ အတူတကွ ပျိုးထောင် မွေးမြူပေးသွားဖို့ ရည်ရွယ်ထားကြောင်း တိရစ္ဆာန်ရုံ တာဝန်ရှိသူတွေက ပြောပါတယ်။
မွန်းဟာ ကိုရီးယား နှစ်နိုင်ငံ ပြန်လည် သင့်မြတ်ရေးအတွက် အကောင်းဆုံး အားထုတ်ခဲ့သူလို့ သတ်မှတ် ခံရပေမယ့် နောက်ပိုင်းမှာတော့ နှစ်ဖက် ဆက်ဆံရေးက ပြန်လည် အေးခဲ တင်းမာသွားခဲ့ပါတယ်။ သူ့ရဲ့ အရိုက်အရာကို ဆက်ခံတဲ့ ယွန်ကတော့ သဘောထား တင်းမာသူ တစ်ဦးဖြစ်ပြီး မွန်းရဲ့ မူဝါဒတွေဟာ မြောက်ကိုရီးယားကို အရှုံးပေးရာ ရောက်နေကြောင်း ဝေဖန် စွပ်စွဲခဲ့ပါတယ်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)