အမ်တီ၊ ဇူလိုင်-၆
မန္တလေးခရိုင် ပုသိမ်ကြီးမြို့နယ် အောင်သပြေကျေးရွာမှ ကိုထွန်း(ခ)ကိုထွန်းမြင့်ဝင်း အိုးဘိုထောင်အတွင်း ဖမ်းဆီးထိန်းသိမ်းခံရစဉ် သေဆုံးခဲ့မူနှင့်ပတ်သက်၍ လူသတ်မူ ရာဇသတ်ကြီးဥပဒေ ပုဒ်မ ၃၀၂ဖြင့် အမူဖွင့်ထားကြောင်း အောင်မြေသာစံမြို့နယ် အမှတ်(၂)ရဲစခန်းမှ သတင်းရရှိသည်။
မန္တလေးမြို့ အောင်မြေသာစံမြို့နယ်ရှိ အိုးဘိုအကျဉ်းထောင်အတွင်း ကိုထွန်း(ခ)ကိုထွန်းမြင့်ဝင်း (၃၈)နှစ် သေဆုံးခဲ့မူနှင့်ပတ်သက်၍ အောင်မြေသာစံမြို့နယ် အမှတ်(၂)ရဲစခန်းမှ စခန်းမှူးက တရားလိုပြုလုပ်ကာ အဆိုပါရဲစခန်းတွင်ပင် ရာဇသတ်ကြီးဥပဒေ ပုဒ်မ ၃၀၂ (လူသတ်မူ)ဖြင့် အမူဖွင့်ထားခြင်းဖြစ်ကြောင်း Mandalay In-depth News မှ ရရှိထားသည့် ရဲမှတ်တမ်းတွင် ဖော်ပြထားသည်။
အောင်သပြေကျေးရွာမှ ကိုထွန်းသည် ၎င်းတို့ကျေးရွာအနီး တည်ဆောက်နေသည့် အယ်လ်ဖာဘိလပ်မြေစက်ရုံကိန်းကို ကန့်ကွက်ခဲ့ရာမှ စီမံကိန်းဧရိယာအတွင်း ကျူးကျော်ဝင်ရောက် မီးရှို့ဖျက်ဆီးသည်ဟုဆိုကာ ဇွန်လ(၂)ရက်တွင် ပုသိမ်ကြီးမြို့နယ် ရဲတပ်ဖွဲ့မှ ပုဒ်မ(၄)ခုဖြင့် ဖမ်းဆီးအမူဖွင့်ခဲ့သည်။ ထို့နောက် အိုးဘိုထောင်၌ ချုပ်နှောင်ခံထားရစဉ် ဇွန်လ(၅)ရက်တွင် အိုးဘိုထောင်ဆေးရုံ၌ သေဆုံးခဲ့သည်။
ကိုထွန်း သေဆုံးမူနှင့်ပတ်သက်၍ မူလက သေမူသေခင်းဖြင့် ရေးဖွင့်ဆောင်ရွက်ခဲ့ရာမှ ဆေးရုံမှ ပြန်ကြားလာသည့် ရင်ခွဲစစ်ဆေးချက်အရ လူသတ်မူဖြင့် အေမူဖွင့်ခြင်းဖြစ်ကြောင်း ရဲမှတ်တမ်းတွင် ဖော်ပြထားသည်။
ကိုထွန်း၏ အလောင်အား ဇွန်(၆)ရက်တွင် မန္တလေးဆေးရုံကြီးသို့ ပို့ဆောင်ကာ ရင်ခွဲစစ်ဆေးခဲ့ပြီး ဆေးရုံမှ ပြန်ကြားလာသည့် ဆေးစာအရ သေဆုံးသူသည် လည်ပင်းတွင် ရရှိသည့် ဒဏ်ရာကြောင့် ဦးနှောက်မြှေးပါးအောက် သွေးသွန်ပြီး ဦးနှောက်ပိညှက်ကာ သေဆုံးခြင်းဖြစ်ကြောင်း ဖော်ပြထားသည့်အတွက် လူသတ်မူအဖြစ် အမူဖွင့်ခြင်းဖြစ်သည်ဟု ဆိုသည်။
ကိုထွန်း သေဆုံးမူနှင့်ပတ်သက်၍ ကျူးလွန်သူတရားခံကို ဖမ်းဆီးနိုင်ရေး စုံစမ်းစစ်ဆေးမူများ လုပ်ဆောင်မည်ဖြစ်ကြောင်း ရဲမှတ်တမ်းတွင် ဖော်ပြထားသည်။
ဇွန်လ(၅)ရက်က မန္တလေးအိုးဘိုအကျဉ်းထောင်အတွင်း အချုပ်သားကိုထွန်း သေဆုံးခဲ့မူနှင့်ပတ်သက်၍ ကိုထွန်းမှာ အရက်ကြောင်ရောဂါကြောင့် သေဆုံးခြင်းဖြစ်ကြောင်း အိုးဘိုထောင်တာဝန်ရှိသူများက ပြောကြားခဲ့သလို အချုပ်သား ကိုထွန်းမှာ မည်သည့်ဒဏ်ရာမှ မရှိဘဲ ထောင်ဆေးရုံတွင် သေဆုံးခြင်းဖြစ်သည်ဟု အိုးဘိုထောင်ပိုင် ဦးချိုဝင်းထွန်းကလည်း ဇွန်(၆)ရက်တွင် Mandalay In-depth News သို့ ပြောကြားထားသည်။
ကိုထွန်း၏ မိသားစုဝင်များကမူ အလောင်းတွင် ဒဏ်ရာများ တွေ့ရှိခဲ့သည့်အတွက် အဖြစ်မှန်ဖော်ထုတ်ပေးရန် တောင်းဆိုခဲ့သည်။
ထို့နောက် အကျဉ်းဦးစီးဌာနကလည်း အိုးဘိုထောင်တွင် အချုပ်သားကိုထွန်း သေဆုံးခဲ့မူနှင့်ပတ်သက်၍ အဖြစ်မှန်ပေါ်ပေါက်စေရန် ဌာနတွင်း စုံစမ်းစစ်ဆေးရေးအဖွဲ့ဖွဲ့ကာ စစ်ဆေးနေကြောင်း ဇွန်(၇)ရက် ညနေပိုင်းတွင် သတင်းထုတ်ပြန်ခဲ့သည်။
ကိုထွန်းသည် အိုးဘိုထောင်သို့ ရောက်ရှိလာပြီးနောက် ဇွန်(၃)ရက်တွင် အရက်ကြောင်ရောဂါ ခံစားရသည့်အတွက် ဇွန်(၄)ရက်တွင် ထောင်ဆေးရုံသို့ ပို့ဆောင်ကုသပေးခဲ့သော်လည်း ဇွန်(၅)ရက် နံနက်တွင် သေဆုံးခဲ့ခြင်းဖြစ်ကြောင်းနှင့် ၎င်းသေဆုံးမှု့နှင့်ပတ်သက်၍ အောင်မြေသာစံမြို့နယ်၊ တွဲဘက်မြို့နယ်တရားသူကြီး(၂) ဒေါ်ခင်မျိုးသင်း၏ ကြီးကြပ်မှု့ဖြင့် သေဆုံးသူအား စစ်ဆေးခဲ့ရာ ပြင်ပဒဏ်ရာ မတွေ့ရှိဘဲ သေဆုံးခြင်းဖြစ်ကြောင်း ဇွန်(၅)ရက် ရဲမှတ်တမ်းတွင် ဖော်ပြခဲ့သည်။
သေဆုံးသူ ကိုထွန်း၏ ရုပ်အလောင်းကို ဇွန်(၇)ရက်တွင် အောင်သပြေကျေးရာ၌ ဂူသွင်းသြင်္ဂိုဟ်ခဲ့သည်။
တချိန်တည်းမှာပင် အယ်လ်ဖာဘိလပ်မြေစက်ရုံ စီမံကိန်းအား ကန့်ကွက်ဆန္ဒပြနေသည့် အောင်သပြေကျေးရွာသားများအား အမူဖွင့်ဖမ်းဆီးရာတွင် အဓိကကိုင်တွယ်နေရသည့် ပုသိမ်ကြီးမြို့မရဲစခန်းမှ ပုသိမ်ကြီးမြို့နယ် ရဲတပ်ဖွဲ့မှူး ရဲမှူး မျိုးညွှန့်သန်းမှာလည်း ဇွန်(၁၂)ရက် နံနက်အစောပိုင်းတွင် ရဲစခန်းအတွင်းရှိ ၎င်း၏ နေအိမ်အတွင်း ဦးခေါင်းသေနတ်မှန်ဒဏ်ရာဖြင့် သေဆုံးနေသည်ကို တွေ့ရှိခဲ့သည်။
ရဲမှူးမျိုးညွှန့်သန်းသည် ပုသိမ်ကြီးမြို့မရဲစခန်းအတွင်းရှိ ၎င်း၏ နေအိမ်၌ ၎င်းကိုင်ဆောင်အသုံးပြုသည့် သေနတ်ဖြင့် ပါးစပ်မှတေ့ပစ်ကာ ဦးခေါင်းနောက်စေ့ပေါက်ထွက် ဒဏ်ရာဖြင့် သေဆုံးခဲ့ခြင်းဖြစ်သည်ဟု ရဲမှတ်တမ်းတွင် ဖော်ပြသည်။ အထက် တာဝန်ရှိသူထံ ဖုန်းဆက်သတင်းပို့ခြင်းမရှိသဖြင့် ရဲတပ်ဖွဲ့ဝင်အချို့ ရဲမှူးမျိုးညွှန့်း၏ နေအိမ်သို့ သွားရောက်ကြည့်ရှု့ရာ တံခါးပိတ်ထားလျှက်တွေ့ပြီး တံခါးဖွ့ကြည့်ရာတွင် နေအိမ်အိပ်ခန်းအတွင်းရှိ ကုတင်ခြေရင်းတွင် ဦခေါင်းသွေးထွက်ဒဏ်ရာဖြင့် ယာလက်တွင် သေနတ်ကိုင်ထားလျှက် လဲကျသေဆုံးနေသည်ကို တွေ့ရှိခဲ့ခြဖြစ်သည်ဟု ဆိုသည်။
မန္တလေးခရိုင် ပုသိမ်ကြီးမြို့နယ် အောင်သပြေကျေးရွာအနီး မြေဧက(၂၁၀)ကျော်ပေါ်တွင် တစ်နေ့ တန်(၅၀၀၀)ကျ ကျောက်မီးသွေးစွမ်းအင်သုံး အယ်လ်ဖာဘိလပ်မြေစက်ရုံ စီမံကိန်းကို မြင့် ရင်းနှီးမြုပ်နှံမူ ကုမ္မဏီမှ အကောင်အထည်ဖော် တည်ဆောက်လျှက်ရှိသည်။
အဆိုပါ ဘိလပ်မြေစက်ရုံ စီမံကိန်းကြောင့် သဘာဝပတ်ဝန်းကျင်နှင့် စိုက်ပျိုးသီးနှံများ ပျက်စီးနိုင်ခြင်း၊ ရွာနှင့်နီးကပ်လွန်းသည့်အတွက် ဆိုးကျိုးများ သက်ရောက်နိုင်သည်ဟုဆိုကာ ဒေသခံအချို့က စီမံကိန်း စတင်တည်ဆောက်ချိန်ကတည်းက ကန့်ကွက်လျှက်ရှိပြီး အစိုးရတာဝန်ရှိသူများကိုမူ စီမံကိန်းကန့်ကွက်သည့် ဒေသခံများကို ဥပဒေနှင့်မညီဟုဆိုကာ ဖမ်းဆီးတရားစွဲဆိုမူများ လုပ်ဆောင်ထားသည်။
ဘိလပ်မြေစက်ရုံစီမံကိန်း ဆန့်ကျင်ကန့်ကွက်မူများနှင့် ဆက်စပ်၍ အောင်သပြေဒေသခံ (၅၀)ဦးခန့် အမူဖွင့်ခံထားရသည်။
ဇွန်လ(၆)ရက်က အောင်သပြေကျေးရွာတွင် ပြုလုပ်သည့် သေဆုံးသူ ကိုထွန်း၏ နာရေး။ ဓါတ်ပုံ- Mandalay In-depth News