په کویټ کې د خطر زنګ له غږېدو وروسته، د ایران سپاه پاسداران ادعا کړې چې د امریکا پر پوځي تاسیساتو یې بریدونه کړي او په پایله کې یې امریکایي ځواکونو ته ګڼ تلفات اوښتي دي.
سپاه پاسداران په یوه خبرپاڼه کې ویلي چې د علي السالم هوايي اډه، د وسلو یوه لویه زېرمه، د پاتریوټ هوايي دفاعي سیستم یوه برخه او د MQ-9 ډرون یوه اډه یې له منځه وړې ده.
سپاه زیاته کړې چې د العدیري پوځي اډې دوه د چورلکو مرکزونه یې هم په نښه کړي، چې د دوی په وینا، له امله یې امریکایي ځواکونو ته ګڼ تلفات او الوتکو ته د پام وړ زیان اوښتی دی.
له دې څو ساعته وړاندې د کویټ پوځ په یوه اعلامیه کې ویلي و، چې په هېواد کې د خطر زنګ او هوايي دفاعي سیستم فعال شوی دی.
پوځ له ټولو اوسېدونکو غوښتي چې خوندي ځایونو ته ولاړ شي او امنیتي لارښوونې په پام کې ونیسي.
د امریکا د پوځ مرکزي قوماندانۍ (سینټکام) اعلان کړی چې د ایران پر ضد یې د بریدونو دولسم پړاو بشپړ کړی، خو تر اوسه یې په کویټ کې د امریکایي ځواکونو د ګڼو تلفاتو په اړه د ایران د ادعا په اړه څه نه دي ویلي.
متحده ایالاتو د روانې اوونۍ په پیل کې هم تایید کړې وه، چې په اردن او سوریه کې د ایران د بریدونو له امله یې څلور پوځیان وژل شوي دي.
