د ملګرو ملتونو سرمنشي انتونیو ګوتېرش دمشق ته د خپل سفر پر مهال د سوریې له لنډمهالي ولسمشر احمد الشرع سره ولیدل او د ملګرو ملتونو او سوریې ترمنځ د همکارۍ د پیاوړتیا په اړه یې خبرې وکړې.
د ملګرو ملتونو د سرمنشي ویاند دفتر نن (یکشنبه، ۴ د زمري) په یوه خبرپاڼه کې ویلي، چې ګوتېرش د سوریې د سیاسي لېږد بهیر کې شوی پرمختګ ستایلی دی.
د خبرپاڼې له مخې، دواړو لورو د سیاسي لېږد، د هېواد د بیارغونې او رغېدو په برخه کې د ملګرو ملتونو او سوریې د همکارۍ د لا پیاوړتیا پر لارو چارو خبرې کړې دي.
د ملګرو ملتونو سرمنشي د ټولو سوریایانو لپاره د یو ارام، باثباته او سوکاله سوریې د جوړېدو په موخه د ټولشموله مشارکت غوښتنه کړې ده.
ګوتېرش همداراز پر سوریې د اسرائیلو بریدونو ته په اشارې سره د دې هېواد د حاکمیت، خپلواکۍ، ملي یووالي او ځمکنۍ بشپړتیا په اړه د ملګرو ملتونو پر ژمنتیا ټینګار کړی او د اسرائیلو له لوري د ۱۹۷۴ کال د «نه پوځي مداخلې» د تړون د نقض په اړه یې اندېښنه څرګنده کړې ده.
هغه ټینګار کړی چې ملګري ملتونه د سوریې له خلکو ملاتړ کوي او د سیاسي لېږد په دې مهم پړاو کې به له سوریایي چارواکو سره نږدې همکاري ولري.
انتونیو ګوتېرش پرون د یوه پلاوي په مشرۍ دمشق ته ورسېد. دا د سوریې د ۱۴ کلنې جګړې له پای وروسته د ملګرو ملتونو د یوه سرمنشي لومړنی سفر دی.
تر دې وړاندې، ۱۷ کاله مخکې، په ۲۰۰۹ کال کې د ملګرو ملتونو هغه مهال سرمنشي بان کي مون سوریې ته سفر کړی و.
د بشار اسد د حکومت پر ضد د جګړې له پیل او د لوېدیځو هېوادونو له بندیزونو وروسته، سوریه له نړیوالې ټولنې منزوي شوې وه.
احمد الشرع، چې تېر کال د بشار اسد له دمشق څخه تر وتلو وروسته واک ته ورسېد، د ټاکنو د ترسره کولو، د ټولشموله حکومت د جوړولو او نړیوالې ټولنې ته د سوریې د بېرته ورګډېدو ژمنه کړې ده.
