د طالبانو د کورنیو چارو وزارت اعلان کړی چې ایران ته د ۵۸۰ زره امریکايي ډالرو د قاچاق مخه نیول شوې او په تړاو یې یو کس نیول شوی دی.
دغه وزارت نن (شنبه، د تلې ۴مه) په یوه خبرپاڼه کې ویلي چې د ډالرو دغه محموله د سرحدي پولیسو له خوا د هرات په اسلامقلعه بندر کې کشف او ضبط شوې ده.
د طالبانو د کورنیو چارو وزارت وايي، د دغې قاچاقي اسعارو د محمولې په تړاو یو کس نیول شوی او ټاکل شوې چې دوسیه یې عدلي او قضايي ادارو ته وسپارل شي.
طالبانو په تېرو پنځو کلونو کې ایران ته د قاچاق کېدونکو اسعارو د څو محمولو د نیولو خبر ورکړی دی.
تر ټولو لویه قاچاقي مالي محموله چې نیول کېدل یې رسنیز شول، د ۱۴۰۲ لمریز کال د عقرب په میاشت کې وه. په دې محموله کې ۴.۵ میلیونه یورو، ۱.۵ میلیونه سعودي ریال او ۱۵۰ زره امریکايي ډالر شامل وو چې په یوه ټکسي کې ځای پر ځای شوي وو.
طالبانو یوه کړنلاره هم تصویب کړې چې له مخې یې هر کس د ځمکنیو پولو له لارې د هېواد د وتلو پر مهال تر ۵۰۰ ډالرو او د هوايي ډګرونو له لارې تر ۵ زره ډالرو پورې نغدې پیسې له ځان سره بهر وړلی شي، او له دې څخه زیاتې پیسې اجازه نه لري.
طالبان وايي، دغه پرېکړه د دې لپاره شوې چې په هېواد کې د ډالرو زیرمه وساتل شي، د بهرنیو اسعارو په وړاندې د افغانۍ ارزښت خوندي شي او د اسعارو بازار مدیریت شي.
