«د افغانستان متحدې جبهې» ویلي چې ځواکونو یې د غور ولایت په مرکز فیروزکوه ښار کې د طالبانو د والي پر دفتر برید کړی دی.
دې جبهې نن مازیګر (سېشنبه، د تلې ۷مه) په یوه اعلامیه کې، چې په ایکس کې یې خپره کړې، ادعا کړې چې په دغه برید کې د طالبانو د والي یو ساتونکی وژل شوی او اته نور ساتونکي یې ټپیان شوي دي.
«د افغانستان متحدې جبهې» په خپله اعلامیه کې ویلي چې د طالبانو والي له دغه برید څخه روغ وتلی دی.
تر دې وړاندې ځینو رسنیو په غور کې د طالبانو د والي په دفتر کې د یوې چاودنې خبر ورکړی و او ویلي یې وو چې له پېښې وروسته په فیروزکوه ښار کې امنیتي تدابیر سخت شوي دي.
په غور کې د طالبانو سیمهییزو چارواکو تر اوسه د دغه برید په اړه څه نه دي ویلي.
په وروستیو ورځو کې د هېواد په بېلابېلو ولایتونو کې د طالبانو پر ضد د وسلهوالو مخالفینو بریدونه زیات شوي دي.
«د افغانستان د آزادۍ جبهې» په نورستان او کونړ کې له طالبانو سره د نښتو له پیل یوه ورځ وروسته، په بدخشان کې د طالبانو د غړو پر یوه موټر د برید خبر ورکړ او ویې ویل چې په دغه برید کې د طالبانو درې غړي وژل شوي او دوه نور ټپیان شوي دي.
پرون د افغانستان په لوېدیځ کې د هرات په ولایت کې هم یوه چاودنه وشوه. طالبانو ویلي چې دغه چاودنه په یوه امنیتي پوسته کې د موجودو وسلو له امله رامنځته شوې او ادعا یې کړې چې په پېښه کې مرګژوبله نه ده اوښتې.
