ټاکل شوې ده چې د مصر پارلمان نن (یکشنبه، د تلې ۲۶مه) د دغه هېواد د ولسمشر عبدالفتاح السیسي په غوښتنه، د سعودي عربستان او د یمن د حوثیانو ترمنځ جګړې ته د ورګډېدو په اړه پرېکړه وکړي.
د مصر رسمي خبري اژانس راپور ورکړی چې د پارلمان غړي به په یوه عمومي غونډه کې د موضوع تر ارزونې وروسته، دې جګړې ته د حکومت د مداخلې اجازه ورکړي یا به یې مخه ونیسي.
د مصر ولسمشر عبدالفتاح السیسي پرون د پوځي اکاډمیو او پوهنځیو د نویو دورو د فراغت په مراسمو کې د سعودي عربستان او د خلیج د عربي هېوادونو د امنیت پر ملاتړ ټینګار وکړ.
السیسي په خپله وینا کې له پارلمانه وغوښتل چې بېړنۍ غونډه جوړه کړي، څو د سعودي عربستان د دفاع په موخه د دغه هېواد د هر ډول غوښتل شوې مداخلې لپاره د اجازې موضوع وڅېړل شي.
مصر په ۲۰۱۵ کال کې په یمن کې د سعودي عربستان په مشرۍ پوځي مداخلې سره یوځای شو. دغه هېواد اوس هم د حوثیانو پر ضد د عربي ائتلاف رسمي غړی دی، خو په تازه جګړه کې یې پوځي مداخله نه ده کړې.
په تېره دوره کې، د سعودي عربستان او حوثیانو ترمنځ د اوربند تر ټینګېدو مخکې، مصر تر ډېره په سره سمندرګي کې د بېړیو د تګ راتګ د لارو په امنیت کې رول درلود.
له حوثیانو سره د جګړې له پیل وروسته، سعودي عربستان په ښکاره له ټولو خلیجي هېوادونو او متحده ایالاتو د مرستې غوښتنه کړې ده. ان اسرائیلي رسنیو هم راپور ورکړی و چې سعودي عربستان له اسرائیلو د مرستې غوښتنه کړې، خو ریاض دغه راپورونه رد کړي دي.
پاکستان او ترکیې، چې د مکې ائتلاف غړي دي، څو ځله د سعودي عربستان د ملاتړ لپاره د دغه دفاعي تړون د فعالولو غوښتنه کړې؛ خو د حوثیانو پر ضد جګړې ته د ورګډېدو د څرنګوالي په اړه یې جزئیات نه دي ورکړي.
