په اسرائیل کې د امریکا سفیر مایک هکابي د اسرائیلي مېشتو له لوري پر یوې امریکايي خبریالې برید «ترهګریز عمل» بللی او د دې پېښې د څېړنې او عاملانو د قانوني تعقیب غوښتنه یې کړې ده.
مایک هکابي نن (یکشنبه، د تلې ۲۶مه) پر ایکس په یوه پیغام کې ویلي، د واشنګټن پوسټ ورځپاڼې خبریاله عکاسه هایدي لوین په یوه وحشیانه او بزدلانه برید کې سخته ټپي شوې ده.
د امریکا سفیر لیکلي: «هایدي د امریکا تبعه ده او د خبریالې په توګه معتبره پېژندپاڼه لري. د ښکېلو کسانو هویت تر څېړنې لاندې دی؛ خو هغه کسان چې پر یوې بېوسلې خبریالې یې برید کړی، باید کلونه په زندان کې تېر کړي.»
هغه زیاته کړې: «موږ د بشپړې څېړنې، د ټولو ښکېلو کسانو د نیولو او د هغوی د قانوني تعقیب غوښتنه کړې ده.»
د امریکا سفیر ویلي: «پر یوې ښځینه عکاسې برید یو کرکجن ترهګریز عمل دی، چې نقابپوشه بزدلانو ترسره کړی دی.»
واشنګټن پوسټ راپور ورکړی چې د دې ورځپاڼې ۶۴ کلنه عکاسه هایدي لوین د جمعې په ورځ (د تلې ۲۴مه) د اشغال شوې لوېدیځې غاړې د رامالله شمال ختیځ ته د ابوفلاح په کلي کې د فلسطینیانو د زیتونو د حاصلاتو د راټولولو د پوښښ پر مهال «د اسرائیلي مېشتو له لوري» تر برید لاندې راغله.
دې رسنۍ د عیني شاهدانو په حواله لیکلي، چې لسګونو نقابپوشه مېشتو په ډبرو او چوبدستیو پر بزګرانو برید وکړ او د زیتونو د بڼونو ځینې برخې یې وسوځولې.
بریدګرو وروسته پر هغو خبریالانو هم برید وکړ، چې په سیمه کې حاضر وو. لوین، چې د «PRESS» نښه لرونکی د خبریالۍ واسکټ یې اغوستی و، ځمکې ته وغورځول شوه او څو ځله په لغتو او لرګیو ووهل شوه. بریدګرو د هغې کمره او ګرځنده ټیلیفون هم واخیستل.
دغه عکاسه په برید کې د یوې پوښتۍ او د ملا تیر د څلورو مهرهوو له ماتېدو او ګڼو نورو ټپونو سره مخ شوه. هغه د درملنې او جراحۍ لپاره لومړی په رامالله او وروسته په تلابیب کې یوه روغتون ته ولېږدول شوه.
واشنګټن پوسټ دغه برید غندلی او د روڼې څېړنې او د عاملانو د مجازاتو غوښتنه یې کړې ده.
د اسرائیل پوځ او پولیسو هم د پېښې د څېړنو د پیل خبر ورکړی دی.
خو عیني شاهدان وايي، اسرائیلي سرتېري د برید پر مهال په سیمه کې حاضر وو، خو د بریدګرو د مخنیوي لپاره یې اقدام ونه کړ او پر فلسطینیانو یې اوښکې بهوونکی ګاز وشینده. د اسرائیل پوځ ویلي، چې دا ادعا څېړي.
دا پېښه په داسې حال کې شوې، چې په اشغال شوې لوېدیځه غاړه کې د فلسطینیانو پر وړاندې د اسرائیلي مېشتو تاوتریخوالی زیات شوی دی.
د ملګرو ملتونو د بشري چارو د همغږۍ دفتر د شمېرو له مخې، د ۲۰۲۶ کال له جنورۍ تر اګست پورې د اسرائیلي مېشتو څه باندې ۱۶۰۰ بریدونه ثبت شوي، چې د خلکو د مرګژوبلې یا مالي زیانونو لامل شوي دي. د راپورونو له مخې، د روان میلادي کال په لومړیو اتو میاشتو کې لږ تر لږه ۷۶ فلسطینیان د اسرائیلي ځواکونو یا مېشتو له لوري وژل شوي دي.
