د طالبانو د سمنګان امنیه قوماندانۍ اعلان کړی چې د دغه ولایت په حضرت سلطان ولسوالۍ کې یوه ښځه د خپل مېړه لهخوا په لرګي وهل شوې او وژل شوې ده.
د سمنګان د طالبانو د امنیه قوماندانۍ ویاند حشمتالله رحماني ویلي، دغه ښځه نن (یکشنبه، د عقرب ۱۰مه) له غرمې وروسته پر سر د لګېدلي ټپ له امله مړه شوې ده.
د رحماني په وینا، د دغې ښځې مېړه د وژنې په تور نیول شوی دی.
هغه د دې پېښې لامل کورنۍ ستونزې بللې او ویلي یې دي چې په دې اړه نورې څېړنې روانې دي.
کورنی تاوتریخوالی چې په افغانستان کې د ښځو پر وړاندې د تاوتریخوالي لویه برخه بلل کېږي، داسې ښکاري چې د طالبانو له بیا واکمنېدو وروسته زیات شوی دی.
طالبانو په داسې حال کې د تاوتریخوالي د قرباني ښځو د ملاتړ بنسټونه لغوه کړي چې د فرمانونو په صادرولو سره یې د ښځو پر وړاندې د تاوتریخوالي یوې کچې ته اجازه ورکړې ده.
د طالبانو د محکمو په جزایي اصولنامه کې کورنی تاوتریخوالی یوازې په هغو مواردو کې جرم ګڼل شوی چې ښځه د هډوکي ماتېدو یا ښکاره ټپونو له امله زیانمنه شوې وي.
دغه ډلې د «زوجینو د تفریق قانون» په وضع کولو سره د ښځو لپاره له تاوتریخوالي ډکې اړیکې څخه جلا کېدل ستونزمن کړي دي.
