close

Seçki 2024

Redaktor seçimi

Video

  • Vəkil qərardan apelyasiya şikayəti verəcəyini deyib

    “AbzasMedia” ilə bağlı cinayət işi üzrə həbsdə olan jurnalistlərdən biri – Nərgiz Absalamova haqqında həbs qətimkan tədbirinin müddəti uzadılıb.

    Fevralın 24-də Xətai Rayon Məhkəməsində prokurorun bu barədə təqdimatına baxılıb.

    Məhkəmədə müstəntiq təqdimatı müdafiə edib. Deyib ki, hələlik istintaq yekunlaşmayıb, bu cinayət işi üzrə bir sıra istintaq hərəkətləri aparılmalıdır. Bu müddətdə onun həbsdə saxlanması məqsədəuyğundur. Çünki azadlıqda qalarsa, istintaqdan yayına, prosesin gedişinə təsir göstərə bilər.

    Nərgiz Absalamovanın özü və vəkili isə təqdimata etiraz edib.

    Jurnalist heç bir cinayət törətmədiyini, peşə fəaliyyətinə görə cəzalandırıldığını bildirib.

    Vəkili isə deyib ki, Nərgiz Absalamovanı həbsdə saxlamadan da istintaq davam etdirilə bilər.

    Nərgiz Absalamovanın həbsindən öncə də istintaqdan yayınmadığını, müstəntiqin çağırışlarına getdiyini yada salan vəkil bildirib ki, ümumiyyətlə, onun həbsdə saxlanması üçün heç bir əsas yoxdur.

    Müdafiə tərəfinin etirazlarına baxmayaraq, hakim təqdimatı təmin edib. Nərgiz Absalamovanın istintaq dövründə həbsdə saxlanma müddəti daha 3 ay artırılıb.

    Vəkil Xətai Rayon Məhkəməsinin bu qərarından apelyasiya şikayəti verəcək.

    Nərgiz Absalamova dekabrın 1-dən həbsdədir. İlkin olaraq, onun haqqında 3 aylıq həbs qətimkan tədbiri seçilmişdi.

    Korrupsiya araşdırmalarıyla tanınan “AbzasMedia” işi üzrə həbslər ötən ilin noyabrın 20-dən başlayıb. Öncə saytın direktoru Ülvi Həsənli, direktor müavini Məhəmməd Kekalov, baş redaktoru Sevinc Vaqifqızı həbs edilib. Daha sonra həbslər araşdırmaçı jurnalist Hafiz Babalı, Nərgiz Absalamova və Elnarə Qasımova ilə davam edib. Onlar da Cinayət Məcəlləsinin 206.3.2-ci (bir qrup şəxs tərəfindən qaçaqmalçılıq) maddəsilə ittiham olunur.

    Bu maddənin sanksiyasında 5 ildən 8 ilə qədər azadlıqdan məhrumetmə cəzası nəzərdə tutulub.

    Noyabrın 20-də Ülvi Həsənli saxlandıqdan sonra “AbzasMedia”nın ofisində axtarış aparılıb. Saytın ofisindən 40 min avro pul tapıldığı iddia olunub.

    Ülvi Həsənli isə orada pul olmadığını, 40 min avronun ofisə onu tapdığını iddia edənlərin özləri tərəfindən qoyulduğunu bildirib.

    Adları çəkilən jurnalistlərin heç biri özünü təqsirli bilmir, “AbzasMedia”da Prezidentin ailə üzvləri də daxil olmaqla, bir sıra vəzifəli şəxslərin biznesi, korrupsiya ilə bağlı araşdırmalara görə cəzalandırıldıqlarını bildiriblər.

  • Bakıda ildən ilə artan, səma boyu uzanan göydələnlər paytaxt sakinlərinin ev dərdlərinə çarə olmayıb. Minlərlə vətəndaş yaşamaq üçün ən təməl ehtiyacdan – mənzildən məhrum qalıb. Evsiz əhali bir ucdan yüksələn kirayə qiymətlərilə üz-üzədir.

    Əmlakçılar danışır ki, müştərilər ucuz qiymətə ev tutmaq üçün növbəyə düzülür, amma əmlak bazarında vəziyyət fərqlidir. İndi köhnə tikili binada 1 otaqlı mənzil kirayələmək 400-500 manat, yeni tikili binadan isə 600-700 manatdan başlayır.

    20 ildir əmlakçılıqla məşğul olan Toma Rəhimova deyir ki, bina evlərinə büdcəsi yetməyən müştərilərinə şəhərdən daha uzaq əraziləri, həyət evlərini təklif edir.

    Bəs kirayə qiymətləri niyə artır?

    Ekspertlərin fikrincə, paytaxtda binaların söküntü bumu ilə bərabər kirayə evlərə olan tələbat artdı. Həmçinin, torpaq və mənzillərin satış qiymətlərinin yüksəlməsi, Ukrayna-Rusiya müharibəsi fonunda Azərbaycana üz tutanların sayının artması qiymətlərin bahalaşmasına təsirsiz ötüşməyib.

    Azərbaycan Qiymətləndiricilər Cəmiyyətinin sədri Vüqar Oruc deyir ki, kirayə qiymətləri ötən illə müqayisədə 12 faiz artıb. Ekspertin fikrincə, hökumət kirayə qiymətlərinin stabil saxlanması üçün sosial dövlət proqramları həyata keçirir.

    İllərini əmlak sahəsində sərf edən əmlakçılar düşünür ki, əgər mənzil bazarında qiymətlər qalxırsa, geriyə dönüş mümkün görünmür.

  • XİN Makronun səsləndirdiyi fikirləri əsassız sayır

    Azərbaycan Xarici İşlər Nazirliyi (XİN) fevralın 21-də Fransa Prezidenti Emmanuel Makronun Parisdə Ermənistanın Baş naziri ilə birgə mətbuat konfransında  səsləndirdiyi fikirləri əsassız adlandırıb.

    Bu barədə XİN-in Mətbuat İdarəsi fevralın 22-də məlumat yayıb.

    Nazirlik qeyd edib ki, Fransa 30 ilə yaxın müddətdə hüquqları pozulmuş, ərazilərindən didərgin düşmüş, kütləvi qırğınlara məruz qalmış azərbaycanlılar barədə indiyə qədər heç bir şərh verməyib:

    Ancaq indi öz istəkləri və heç bir zorakılıq tətbiq olunmadan Azərbaycan ərazilərini tərk etmiş ermənilərin hüquq və təhlükəsizliyindən danışması tamamilə yersizdir”.

    Dünən Fransanın dövlət başçısı Emmanuel Makron keçirdiyi brifinqdə 2022-ci il “Praqa görüşü”ndə Ermənistanın Baş nazirinin Alma-Ata bəyannaməsinə sadiq qaldığını deyib.

    Makron həmçinin vurğulayıb ki, Azərbaycan Ermənistanın ərazi bütövlüyü və xəritələrlə bağlı mövqeyindəki qeyri-müəyyənliyi aradan qaldırmalıdır.

    O, Azərbaycanı Qarabağı tərk edən və geri qayıtmaq istəyən ermənilərin maneəsiz dönüşünü təmin etməyə çağırıb.

    XİN bildirib ki, Fransa tərəfinin məhz indi razılaşmalara zidd olaraq Alma-Ata bəyannaməsi və müəyyən xəritələr çərçivəsində ərazi bütövlüyünün vacibliyinə toxunması suallar doğurur.

    Nazirlik hesab edir ki, Fransanın 30 ilə yaxın müddətdə davam etmiş Ermənistan təcavüzü və Azərbaycan ərazilərinin işğalı, habelə hazırda 8 kəndin hələ də işğalda qalması ilə bağlı suallara aydınlıq gətirməsi daha faydalı olardı:

    “Heç bir təhrikedici amil olmadan 5 aya yaxın davam edən sabitliyi pozan Ermənistanın tənqid edilməsi əvəzinə, Azərbaycanın qeyri-proporsional cavab tədbiri görməkdə təqsirləndirilməsi qəbuledilməzdir və bu kimi qərəzli yanaşmalara son qoyulmalıdır”.

    Nazirlik həmçinin Parisi bölgədə gərginlik yaratmaqda ittiham edib:

    Fransanın bölgədə yeni gərginlik yaratmaq, sülh və sabitliyə mane olmaq istiqamətində yürütdüyü məkrli siyasətin heç bir nəticə verməyəcəyini bir daha bəyan edirik”.

    Münaqişənin qısa xronikası

    2020-ci ilin sentyabrında Azərbaycan və Ermənistan silahlı qüvvələri arasında 44 günlük İkinci Qarabağ müharibəsi baş verib.

    Azərbaycan Qarabağın bir hissəsinə və ətraf 7 rayona nəzarəti bərpa edib.

    2023-cü ilin sentyabrın 19-da Azərbaycan Qarabağda lokal hərbi əməliyyat keçirib.

    Sentyabrın 28-də separatçı “Dağlıq Qarabağın (Artsax) Prezidenti” Samvel Şahramanyan “respublika”nın buraxılması barədə fərman imzalayıb.

    O, fərmanı 19 sentyabr 2023-cü ildən sonra yaranmış vəziyyətlə əlaqələndirib.

    Oktyabrın 15-də isə Prezident İlham Əliyev Xankəndi şəhərinə səfər edib.

    Prezident Xankəndidə Azərbaycan bayrağını qaldırıb və çıxış edib.

    Çıxışında Azərbaycanın öz suverenliyini tam bərpa etdiyini, Qarabağ probleminin bitdiyini, münaqişənin sona çatdığını deyib.

Siyasət

Bölgə

Sosial

Fikrimcə

Araşdırma

Sağlıq

Mədəniyyət