Malayziya şahzadəsi islamı qəbul etmiş modellə evləndi FOTO

31 yaşlı Tunku Tun Aminah Maimunah Iskandariah və İslamı qəbul etmiş 28 yaşlı hollandiyalı Dennis Muhammad Abdullah-ın nikah mərasimi keçirilib. Bəylə gəlinin həm özəl, həm də ictimai toyları keçirilib.

Gəlin və bəyin başda oturduğu rəsmi mərasim 1200 ictimaiyyət üzvünün iştirakı ilə keçirilib, AFP agentliyi xəbər verir. Ştatın paytaxtı – Cohor Baru şəhərinin Dataran Bandaraya meydanında toplaşanlar isə mərasimi böyük ekran vasitəsilə izləyiblər.

Tunku Tun Aminah Maimunah Iskandariah Cohor sultanın 6 uşağı arasında yeganə qızdır. Bazar ertəsi axşam saatlarında keçirilən mərasimdə o, atası Sultan Ibrahim İsmailin xeyir-duasını qazanıb. Nigahın təsdiqi əlaməti olaraq ailə üzvləri və qonaqlar yeni cütlüyün üzərinə ətirli su çiləyib, başları üzərindən sarı düyü səpələyiblər.

Sinqapurda model işləyən hollandiyalı bəyin əsl adı Dennis Verbaas-dır və o, Amsterdam şəhərində doğulub. Bəyin atası gül, anası isə geyim mağazasında işləyir. Hollandiyalı gənc 2015-ci ildə Cohordakı inşaat şirkətində işləyərkən İslamı qəbul edib. Daha əvvəl isə o, Sinqapurda Tampines Rovers futbol klubunun marketinq üzrə meneceri olub.

Kral ailəsində nikah mərasiminə əsaslı hazırlıq üçün saray bəzədilib, küçələrə dövlət bayraqları asılıb. Bununla yanaşı ərazidə təhlükəsizlik tədbirləri gücləndirlib.

Malayziyanın cənubundakı Cohor ştatının kral ailəsi zəngin və qüdrətlidir. O, öz ordusuna malikdir və Cohor fərdi hərbiyyəyə sahib olan yeganə ştatdır.

Daha əvvəl cütlük ailə üçün xüsusi nikah mərasimi keçirib. Bu onların arasında 3 ildir ki, davam edən məhəbbətin kulminasiyası olub. Deyilənə görə cütlüyün Malayziyadakı kafedə ilk görüşü dərhal qarşılıqlı cazibə yaradıb.

Şahzadənin üzərində parıltılı daş-qaşla bəzədilən zərif ağ don olub. Yerli adətlərə uyğun olaraq, gəlinə 22.50 ringgit (8.73 AZN) dəyərində başlıq pulu təqdim olunub.

“Öz evimizə köçüb, ər-arvad kimi yeni həyata başlayacağıq. Bu ilk dəfədir ki, valideynlərim və ailəmdən ayrı düşüb tək yaşayacağam”, – Cohor Kral Mətbuat Katibliyinin yaydığı bəyanatda şahzadədən sitat gətirilir.

(BBC azeri)