AXCP sədri Əli Kərimli
Gədəbəy rayonundan keçmiş millət vəkili, tanınmış iqtisadçı və iş adamı Nazim Bəydəmirlinin DİN tərəfindən şübhəli şəxs kimi saxlanılması haqqında məlumat yayılıb. İlkin məlumata görə, Nazim Bəydəmirli olduqca qeyri-adi ittihamla – səhmdarı olduğu şirkətdən pul tələb etdiyi üçün şübhəli şəxs qismində saxlanılıb.
Gədəbəyin Söyüdlü kəndindəki yaşlı anaların etirazını əlaqələndirməyə hakimiyyətin adam axtardığı ilk günlərdə Nazim Bəydəmirlinin adı hallandırılmış, hakimiyyətə yaxın mətbuat onun həbsini hələ o günlərdə anons etmişdi. Görünür Nazim bəyin həbsinin Gədəbəydəki etirazlarla bağlı olduğunu ört-basdır etmək üçün ona bu qədər absurd ittiham irəli sürməli olublar.
Nazim bəylə şəxsən tanış deyiləm. Ancaq onun tənqidi iqtisadi təhlilləri ilə tanışam. Açıq fikirli, mütərəqqi dünyagörüşlü bir şəxsdir Nazim bəy. Nazim bəyin iş adamı ola-ola, hakimiyyəti (korrekt olsa da) açıq tənqid etməsi “Azərbaycan standartlarına” görə çox qeyri-adi görünürdü. Bu qədər dözə bildilər. Nazim Bəydəmirlinin həbsini siyasi motivli repressiya aktı kimi qiymətləndirirəm. Rejim daha bir absurd hərəkətə imza atmamalı, Nazim Bəydəmirlini azad etməlidir.