Ўзбекистонда АЭС қурилиши шартномаси ҳали тайёр эмас

Россиянинг “Независимая газета” нашрига кўра, Ўзбекистонда атом электр станциясини (АЕС) қуриш бўйича шартнома ҳали тайёр эмас, Россия томони билан музокаралар давом этмоқда.

Бу ҳақда душанба куни журналистларга Ўзбекистон Энергетика вазирининг ўринбосари Шерзод Хўжаев маълум қилди. “Айтишим мумкинки, биз шартноманинг барча деталларини муҳокама қилиш учун марра чизиғига етиб келдик”, деди Хўжаев. Вазир ўринбосарининг сўзларига кўра, томонлар шартномани “камчиликларсиз”, ўзаро манфаатли тарзда имзолаш учун барча техник ва молиявий унсурларини ишлаб чиқишмоқда. Икки мамлакат раҳбарияти имзолаш муддатлари бўйича бир бирига қатъий шартлар қўймаяпти, дея қўшимча қилди у.

Феврал ойи охирида “Росатом” давлат корпорацияси раҳбари Алексей Лихачев Ўзбекистонда атом электр станцияси учун EPC шартномасини (шартнома ишнинг уч босқичини ўз ичига олган: лойиҳалаштириш, ускуналар ҳариди ва қурилиш – таҳририятдан) 2020 йил июнида имзолаш кутилаётганини айтган эди.

Лондондаги Шарқ ва Африка тадқиқотлари институти таҳлилчиси Алишер Илҳомов Ўзбекистоннинг Жиззах вилоятида атом электр станциясини қуриш ва “Росатом” билан тегишли битим тузиш ҳақидаги ҳукумат қарори Ўзбекистон манфаатларига жавоб бермайди дея ҳисоблайди.

Бу станциянинг ўзи учун ҳам, бутун мамлакат учун ҳам, иқтисодий жиҳатдан зарарли ва хавфли бўлган режадир. Иқтисодий нуқтаи назардан, муқобил энергия манбалари, айниқса қайта тикланадиган энергия турлари, Ўзбекистонга атом электростанцияларига қараганда анча кўп ва тезроқ иқтисодий самара беради, дея ҳисоблайди Алишер Илҳомов.

Жорий йилнинг феврал ойида Ўзбекистон Энергетика вазирлиги «яқин келажакда» АЭС қурилишининг атроф-муҳитга таъсирини баҳолаш бўйича мамлакатда ва қўшни давлатларда, хусусан, Қозоғистонда жамоатчилик муҳокамалари ўтказилиши хақида хабар қилган эди.

Eltuz.com