Дарс ўрнига Озодбекнинг қўшиғи

Ўзбекистон мактабларида дарсдан олдин мадҳия куйланиб, танаффусда махсус радиокарнайлардан ватан мавзусидаги шеър ва қўшиқлар эшиттирила бошланди.

Жорий қилинган бу қоидага ëзувчи ва собиқ мулозим Мурод Муҳаммад Дўст муносабат билдирди:

“Янги Ўзбекистонда ўқувчиларнинг 9 ой давомида дарс олдидан мадҳия куйлаши расм бўларкан. Албатта, бу – минг тасаддуқ айтишга арзийдиган гўзал ташаббус. Лекин, афсуски, таътил пайти негадир ташаббускорлар эътиборидан четда қолибди.

Айни долзарб масалани зудлик билан ҳал қилишни маҳалла вазирлигига юклашни талаб қилишимиз керак. Таътил янада мазмунли ўтиши учун қўшимча тадбир сифатида оммавий мадҳиябозликка ота-оналару бобою бувиларни ҳам жалб қилиш фойдадан холи бўлмайди. Ҳар тонгни безайдиган янги қутлуғ тадбирни ҳар шомга ҳам кўчириш тажрибасини бирор вилоят ёки каттароқ шаҳар миқёсида синаб кўриш мумкин”.

“Элтуз”да нусхаси бўлган ҳужжатда танаффусда махсус радиокарнайлардан Озодбек Назарбековнинг еттита қўшиғи навбатма-навбат куйланиши борасида кўрсатма берилган.

Eltuz.com