Бухоро Давлат Техника Университетидаги шубҳали шартномалар

Элтуз таҳририятига Бухоро давлат техника университетида давлат харидлари жараёнларида кузатилаётган шубҳали ҳолатлар юзасидан мурожаат келиб тушди. Мурожаатда таъкидланишича, университетда бундай шартномалар аллақачон оддий ҳолга айланиб улгурган.

Маълум қилинишича, университетнинг иқтисодий аҳволи оғир бўлишига қарамай, пиар ишлари тўхтамайди. Доимий равишда турли меҳмонлар қабул қилиниб, уларда университет ҳақида ижобий тасаввур шакллантириш мақсадида миллиардлаб сўм бюджет маблағлари сарфланаётгани айтилмоқда.

Мурожаат муаллифининг қайд этишича, сўнгги икки йил ичида университет томонидан юз миллиард сўмдан зиёд бюджет маблағлари самарасиз йўналишларга сарфланган. Буни амалга оширилган давлат харидлари рўйхатлари орқали ҳам кўриш мумкин. Энг ачинарлиси, бу ҳолатдан вилоят ва республика даражасидаги мутасаддилар хабардор экани айтилмоқда.

Шунингдек, университет раҳбарияти мавжуд муаммоларни яшириш ва “чиройли кўрсатиш”ни одатга айлантиргани, бу борада республикада иқтисодий соҳани назорат қилувчи ва Сенатда таъсирга эга шахсларга таяниб иш тутаётгани ҳақида даъволар билдирилган.

Университет жамоаси эса Шавкат Мирзиёев томонидан Олий Мажлисга йўлланган мурожаатномада айтилган қатъий талаб ва принциплар амалда ижро этилишини, айниқса, бу жараён айнан Бухоро давлат техника университетидан бошланишини кутмоқда.

Элтуз таҳририяти мазкур ҳолатлар юзасидан университет раҳбарияти ва мутасадди идоралардан расмий муносабат ва изоҳ кутишини маълум қилади.