ИИВ академиясида қонунбузарликлар

Ўзини Ички ишлар вазирлиги академиясининг 2-курс курсантлари деб таништирган манбалар Элтуз таҳририятига мурожаат қилиб, таълим муассасасида қатор жиддий қонунбузарликлар мавжудлигини билдирди.

Мурожаатда айтилишича, Ички ишлар вазирлиги академиясида таълим сифати эмас, пора олиш ва таниш-билиш орқали масалаларни ҳал қилиш ҳолатлари устувор бўлиб қолган. 

Манбаларга кўра, академияга ишга кириш учун ўртача 3000 АҚШ доллари талаб этилади, таниш-билиш бўлмаган ҳолларда эса бу деярли имконсиз.

Шунингдек, мурожаатда академия раҳбари – Рустам Абдуғаниевич Ҳатамов фаолиятига оид оғир айбловлар илгари сурилган. Курсантлар таъкидлашича, лавозим ёки ишда енгилликларга эришиш учун айрим аёллардан ноқонуний тарзда фойдаланиш ҳолатлари мавжуд экани бутун академияга маълум, бу эса хизмат этикаси ва қонунчиликка зид ҳисобланади.

Мурожаатда яна айтилишича, қоидабузарлик содир этган курсантлар таниш-билиш ёки пул орқали жазодан қутулиб қолиши мумкин. Масалан, телефон билан қўлга тушган курсантлар 10 миллион сўм миқдорида пора бериб ўқишдан ҳайдалмасликка эришгани ҳақида даъволар келтирилган.

Курсантлар академия таълим муассасасидан кўра, таҳқирлаш, ҳақорат, порахўрлик ва бошқа ноқонуний ҳолатлар авж олган жойга айланиб қолганини таъкидламоқда. Улар ўз хавфсизлигидан қўрқиб, исмларини ошкор қилмасликни сўраган.

Таҳририят мазкур даъволар юзасидан расмий идоралар изоҳига очиқлигини маълум қилади.