Афғонистонда кучли зилзила – қурбонлар бор

Афғонистонда 6,3 магнитудали ер қимирлаши юз берди. Мозори-Шариф яқинидаги туманлар бундан энг кўп зарар кўрди – у ерда ўнлаб бинолар, баъзилари бутунлай вайрон бўлган. Шаҳарнинг машҳур тарихий Мовий масжиди шикастланган.

Маҳаллий аҳоли уйлар қулашидан қўрқиб, ярим тунда кўчаларга югуриб чиққан. Reuters агентлиги маълумотларига кўра, камида 7 киши ҳалок бўлган. Яна 150 га яқин киши жароҳат олган. Сейсмик тўлқинлар Афғонистондан ташқари – қўшни Тожикистон ва Ўзбекистонда ҳам сезилган.

Август ойида 6,0 магнитудали зилзила Афғонистонда 2200 дан ортиқ одамнинг ҳаётига зомин бўлган эди. Кейинчалик маълум бўлишича, толиблар аёллар ва қизларни ҳар қандай ёрдамсиз қолдирган. «Толибон» аёлларга эркак шифокорларга мурожаат қилишни тақиқлайди, аёл шифокорлар эса мамлакатда деярли йўқ.