Ташкент ҳокимининг котиби собиқ депутат аёлни «тўшак» билан шантаж қилмоқда

«Уч йил бурун жуда дағал бир гап қилиб эдинг менга, кўрсатаман энди сенга!» Тошкент вилоят ҳокими матбуот котиби тўрт йил бурун тармоқда сазойи қилиниб ҳайдалган депутат аёлга нимасини кўрсатмоқчи бўлди.

2021 йилнинг ноябрида Қонунсизликка қарши курашгани ортидан кимларгадир ёқмай қолган собиқ депутат Феруза Бабашеванинг тўшагига бурун суқиб уни бутун мамлакатга шармисор қилиш кампанияси бўлиб ўтган эди. Жамоатчиликнинг босими билан аёл депутатлик мандатини топширишга мажбур бўлган эди. 

Халқ ноиблиги унга фақат таҳқир ва тазйиқдан бошқа нарса бермаганини урғулаган Бабашева ўшанда депутатлик гувоҳномаси ва кўкрак нишонини қайтариб, истеъфо беришини маълум қилган эди.  Ойлар, йиллар ўтиб бу тўполон ҳам унутилди. 

Элтуз бировнинг кир тўшагини титмайди. Масалан, собиқ депутат Кушербаев ҳақидаги мақолалардан мақсад – бир норасида гўдакнинг алимент ҳаққини ундиришга кўмаклашиш эди. Лекин Феруза Жўрабековна ушбу ҳаракатларимизни дўсти Расулга қарши «фитна» ва «душманчилик»ка йўйди.

Миллион марта такрорлаб ҳам чарчамаймиз: Гўшт алоҳида, пашша алоҳида. Масала бола ҳуқуқлари, аёллар ҳуқуқи, виждон эркинлиги ҳақида бўлса Элтуз доим жабрланган томонга қулоқ тутиб, минбар беради.

Ҳозир ҳам Бабашеванинг шахсий муносабатларига аралашмаймиз. У амалда қонунни бузгани йўқ, кишиларнинг даҳлсизлиги ва тамал ҳуқуқларига рахна солмади. Бироқ Тошкент вилояти ҳокимининг матбуот котиби Ферузани яна бир бор обрўсизлантиришга уринди. Аёлнинг ҳуқуқлари поймол этилди.

Феруза Жўрабековнанинг тармоқда йиғлаб билдиришича Зойир Мирзаевнинг матбуот котиби Беҳзод Қобулов ўзининг шахсий каналида собиқ депутат аёлга қарши самосуд эълон қилган. Ферузанинг отасини «кўт» деб атаган ва аллақандай маҳсус конвертларни фош этиш билан таҳдид қилган.

Матбуот котибининг каналидаги бу чақириқ бироздан кейин ўчирилди. Беҳзод Қобуловнинг ўзи эса «мени взлом қилишди» деган баҳонани маҳкам ушлаб турибди.

Собиқ депутатнинг таъкидлашича, матбуот котиби бундан аввал ҳам уни обрўсизлантиришга уринган, аёлнинг шахсий муносабатлари ҳақида иғво тўқиб Зойир Мирзаевнинг Телеграм каналига жойлаб юборган. 

«Взлом» ҳақидаги чўпчакка биз ҳам, Қобуловнинг ўзи ҳам ишонмайди. Шу ўринда савол туғилади: Зойир Мирзаев ёки унинг матбуот котиби бу аёлга нега қасд қилмоқда? Орада қандай нифоқ бор? Ферузага қайта-қайта лой чаплашдан муддао не? Собиқ депутат аёл ҳокимликнинг думини шунчалар қаттиқ босганмиди? Нега паспортида «эркак» деб ёзилган котиблару мулозимлар душманликда тўшак риторикасидан қайта-қайта фойдаланяпти?

Қўлига уч-тўрт сўм, кетига кресло теккан эркак мулозимларнинг аксариятида икки хотин, бир маъшуқа, бир неча яширин бола-чақаси бўлиши ғоят табиий ҳол. Зойир тўра ва унинг котибида ҳам нозик шахсий сирлар бўлиши эҳтимоли юздан тўқсон фоиз. Шундай экан, йиқилган аёлни тепкилаб, омма қаршисида шарманда қилавериш ҳоким ва матбуот котибига ярашиқсиз қилиқ эмасми.

Элтуз Узбекистондаги аёллар ҳуқуқи ва бошқа ижтимоий аҳамиятга эга воқеаларни таҳлил қилишда давом этади. Каналимизга обуна бўлинг. Видеоларимизга изоҳлар қолдиринг.