စစ်ကောင်စီတပ်၏ ကျူးလွန်မှုကို KIAအားအပြစ်ပုံချနေဟု ပြော
စစ်ကိုင်းတိုင်း ဒီပဲယင်းမြို့နယ် လက်ယက်ကုန်းရွာ စာသင်ကျောင်းကို စစ်ကောင်စီတပ်က လေကြောင်းမှ ပစ်ခတ်တိုက်ခိုက်ခဲ့သည့် လုပ်ရပ်အပေါ်ရှုတ်ချကြောင်း ကချင်လွတ်လပ်ရေး တပ်မတော်(KIA) သတင်းပြန်ကြားရေးဌာန တာဝန်ခံ ဗိုလ်မှုးကြီးနော်ဘူက ပြောသည်။
စက်တင်ဘာ ၁၆ရက်က ဒီပဲယင်းမြို့နယ် လက်ယက်ကုန်းရွာကို စစ်ကောင်စီတပ်က စစ်ရဟတ် ယာဉ်များဖြင့် ပစ်ခတ်တိုက်ခိုက်ခဲ့ရာ စာသင်နေသည့် ကလေးငယ်များအပါအဝင် ကလေးငယ် ခုနစ်ဦး ထက်မနည်းနှင့် ဒေသခံပြည်သူ ခြောက်ဦးသေဆုံးကာ အများအပြား ဒဏ်ရာရရှိခဲ့သည်။
ယင်းဖြစ်ရပ်နှင့်ပတ်သက်၍ ဗိုလ်မှူးကြီးနော်ဘူက “ဒါရှုံ့ချတယ် ။ မလုပ်သင့်ဘူး ။လုံး၀ မလုပ်သင့်တဲ့ ကိစ္စဖြစ်ပါတယ်”ဟု ယနေ့(စက်တင်ဘာ ၂၂ရက်) ပြောကြားသည်။
စစ်ကောင်စီတပ်ကမူ လက်ယက်ကုန်းရွာ၌ KIAနှင့် PDFများ ရှိသည်ဟု သတင်းပေးလာ၍ ဝင်ရောက်ရှင်းလင်းခြင်းဖြစ်ကြောင်း KIA/PDFတို့အား စွပ်စွဲပြောဆိုခဲ့သည်။
“အဲဒါက အလကားပါ။ ဒီကောင်တွေ(စစ်ကောင်စီတပ်)ပါ။ ကျွန်တော်တို့ KIA/KIOနဲ့ ဘာမှမဆိုင်ဘူး။ အဲဒီဘက်က ကျွန်တော်တို့ လှုပ်ရှားမှုလည်းမရှိပါဘူး။ ကျွန်တော်တို့ နယ်မြေလည်း မဟုတ်ပါဘူး။ ကျွန်တော်တို့ ပတ်သက်မှုဘာမှမရှိပါဘူး”ဟု ဗိုလ်မှူးကြီး နော်ဘူက ပြောသည်။
စစ်ကောင်စီတပ်အနေဖြင့် KIAကို အပြစ်ပုံချရန် ပြောဆိုခြင်းဖြစ်သည်ဟု ၎င်းက ဆိုသည်။
“ကျွန်တော်တို့ကို တိုက်ခိုက်ချင်လို့ ပြောတာပဲဖြစ်မှာပါ”ဟု ဗိုလ်မှူးကြီးနော်ဘူက ပြောသည်။
ဒီပဲယင်းဒေသခံကမူ တိုက်ပွဲဖြစ်ပွားမှုမရှိဘဲ စစ်ကောင်စီတပ်က လက်ယက်ကုန်းရွာကို ပစ်မှတ်ထား တိုက်ခိုက်လာခြင်းဖြစ်ကြောင်း၊ ယခုကဲ့သို့ အကြမ်းဖက်တိုက်ခိုက်မှုများကို စစ်ကောင်စီတပ်က ဒီပဲယင်းနယ်တွင် အကြိမ်ကြိမ်ပြုလုပ်ခဲ့ခြင်းဖြစ်၍ စစ်ကောင်စီတပ်၏ အကြမ်းဖက်လုပ်ရပ်များအပေါ် သီးခြားမှတ်ချက်မပေးလိုတော့ကြောင်း ပြောကြားသည်။
