မိုးသည်းထန်စွာရွာသွန်းပြီးနောက် မြေပြိုမှုများဖြစ်နေသည့် ဒေသတွင်းလမ်းပိုင်းများကို မင်းတပ်မြို့နယ်ပြည်သူ့အုပ်ချုပ်ရေးအဖွဲ့က စက်ယန္တရားအသုံးပြု၍ ပြုပြင်ပေးနေသည်။
အများပြည်သူသွားလာရေး အဆင်ပြေစေရန်အတွက် လမ်းပြုပြင်ပေးနေခြင်းဖြစ်ကြောင်း မင်းတပ်မြို့နယ်ပြည်သူ့အုပ်ချုပ်ရေးအဖွဲ့က သတင်းထုတ်ပြန်ထားသည်။
“ပြည်သူတွေ အဆင်ပြေအောင် ကျွန်တော်တို့ စီမံပေးနေတာပါ”ဟု မင်းတပ်မြို့နယ်ပြည်သူ့အုပ်ချုပ်ရေးအဖွဲ့မှ တာဝန်ရှိသူတစ်ဦးက ပြောသည်။
![ဓာတ်ပုံ - မင်းတပ်မြို့နယ်ပြည်သူ့အုပ်ချုပ်ရေး - သတင်း၊ ပြန်ကြားရေးနှင့် မှတ်တမ်း](https://i0.wp.com/www.ludunwayoo.com/wp-content/uploads/2022/09/306582774_476032581252866_1795815625205459457_n.jpg?resize=880%2C495&ssl=1)
ချင်းတောင်တန်းဒေသသည် မိုးများပါက မြေပြိုမှုအန္တရာယ်ရင်ဆိုင်ရသည့် ဒေသဖြစ်သည်။ ယခုကာလသည် အနောက်တောင်မုတ်သုံလေဆုတ်ခွာနေသည့်ကာလဖြစ်ပြီး ချင်းပြည်နယ်အပါအဝင် ဒေသအများစု၌ ပုံမှန်ထက် မိုးရွာသွန်းနိုင်မည့်အခြေအနေရှိနေသေးကြောင်း အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်စီမံခန့်ခွဲရေးဝန်ကြီးဌာနက သတင်းထုတ်ပြန်ထားသည်။
![ဓာတ်ပုံ - မင်းတပ်မြို့နယ်ပြည်သူ့အုပ်ချုပ်ရေး - သတင်း၊ ပြန်ကြားရေးနှင့် မှတ်တမ်း](https://i0.wp.com/www.ludunwayoo.com/wp-content/uploads/2022/09/309637227_476032641252860_864951712309648802_n.jpg?resize=880%2C495&ssl=1)
ချင်းပြည်နယ် မင်းတပ်မြို့သည် စစ်အာဏာရှင်တော်လှန်ရေးတွင် စနစ်တကျရှိပြီး မြို့နယ်ပြည်သူ့အုပ်ချုပ်ရေးအဖွဲ့၊ချင်းပြည်သူ့ကာကွယ်ရေးအဖွဲ့များက ဒေသတွင်း အုပ်ချုပ်ရေးယန္တရားလည်ပတ်အောင် ကြိုးစားနေသည်။ ယခုရက်ပိုင်းအတွင်း စစ်ကောင်စီက မင်းတပ်မြို့ပေါ်ကို အင်အားတိုးချနေပြီး လုံခြုံရေးသတိပြုနေထိုင်ကြရန် မင်းတပ်ပြည်သူ့ကာကွယ်ရေးအဖွဲ့က သတိပေးထားသည်။
ဓာတ်ပုံ – မင်းတပ်မြို့နယ်ပြည်သူ့အုပ်ချုပ်ရေး – သတင်း၊ ပြန်ကြားရေးနှင့် မှတ်တမ်း
![](https://i1.wp.com/ludunwayoo.com/wp-content/uploads/2021/08/banner-logo1-50px.png)