KNLA နဂါးနီစစ်ကြောင်းပူးပေါင်းတပ်ဖွဲ့နှင့် စစ်ကောင်စီတပ်တို့အကြား (၂)ရက်အတွင်း တိုက်ပွဲနှစ်ကြိမ်ဖြစ်ပွားခဲ့ရာ စစ်ကောင်စီဘက်မှ (၁၆)ဦး အရှင်ဖမ်းဆီးရမိခဲ့ပြီး (၂၃)ဦး ထွက်ပြေးလွတ်မြောက်သွားခဲ့သည်ဟု နဂါးနီးစစ်ကြောင်းက သတင်းထုတ်ပြန်ထားသည်။
ကရင်ပြည်နယ် ကြာအင်းဆိပ်ကြီးမြို့နယ်အတွင်းရှိ တဂေးကျေးရွာအနီးတွင် စစ်ကောင်စီတပ်နှင့် ကရင်အမျိုးသားလွတ်မြောက်ရေးတပ်မတော်(KNLA) နဂါးနီစစ်ကြောင်းပူးပေါင်းတပ်ဖွဲ့တို့အကြား အောက်တိုဘာလ(၁၅)ရက်က ညနေသုံးနာရီမှ ခြောက်နာရီအထိ တိုက်ပွဲတစ်ကြိမ်၊ အောက်တိုဘာ(၁၆)ရက် နံနက်ခြောက်နာရီမှ နေ့လည်(၁၂)နာရီအထိ တစ်ကြိမ် စုစုပေါင်းထိတွေ့တိုက်ပွဲနှစ်ကြိမ် ဖြစ်ပွားခဲ့သည်။
![KNLA နဂါးနီစစ်ကြောင်းပူးပေါင်းတပ်ဖွဲ့က စစ်ကောင်စီတပ်သား ၁၆ ဦးအရှင်ဖမ်းမိထားကြောင်းထုတ်ပြန်](https://i0.wp.com/www.ludunwayoo.com/wp-content/uploads/2022/10/309847229_491575149698609_3988167257762897972_n.jpg?resize=880%2C660&ssl=1)
ထိုတိုက်ပွဲတွေအတွင်း စစ်ကောင်စီ၏ စကခ(၁၃)လက်အောက်ခံ ခမရ(၃၅၈)တပ်ရင်းမှ ခြောက်ဦးသေဆုံးပြီး (၁၆) ဦးကို အရှင်ဖမ်းဆီးရမိခဲ့ကာ (၂၃)ဦး ထွက်ပြေးလွတ်မြောက်သွားခဲ့သည်ဟု နဂါးနီစစ်ကြောင်းကဆိုပါသည်။
တိုက်ပွဲဖြစ်ပွားချိန်အတွင်း ကြာအင်းဆိပ်ကြီးဗျူဟာကုန်းမှ လက်နက်ကြီး(၁၂၀ မမ)ဖြင့် တရစပ်ပစ်ကူပေးနေသောကြောင့် ပူးပေါင်းတပ်ဖွဲ့များဘက်မှရဲဘော်များအနေဖြင့် ခက်ခက်ခဲခဲတိုက်ခိုက်ခဲ့ရသည်ဟု နဂါးနီစစ်ကြောင်းကဆိုသည်။
![KNLA နဂါးနီစစ်ကြောင်းပူးပေါင်းတပ်ဖွဲ့က စစ်ကောင်စီတပ်သား ၁၆ ဦးအရှင်ဖမ်းမိထားကြောင်းထုတ်ပြန်](https://i0.wp.com/www.ludunwayoo.com/wp-content/uploads/2022/10/310602586_491575059698618_6035791152420420639_n.jpg?resize=720%2C960&ssl=1)
![KNLA နဂါးနီစစ်ကြောင်းပူးပေါင်းတပ်ဖွဲ့က စစ်ကောင်စီတပ်သား ၁၆ ဦးအရှင်ဖမ်းမိထားကြောင်းထုတ်ပြန်](https://i0.wp.com/www.ludunwayoo.com/wp-content/uploads/2022/10/311615897_491575099698614_2188706645571388127_n.jpg?resize=880%2C1173&ssl=1)
တိုက်ပွဲပြီးချိန်တွင် နယ်မြေရှင်းလင်းဆောင်ရွက်ခဲ့ရာ စစ်ကောင်စီဘက်မှ လက်နက်(၁၈)လက်နဲ့ ပစ္စတိုတစ်လက်၊ လက်ပစ်ဗုံး(၅)လုံး၊ ကျည်တောင့်(၁၃၀၀)၊ RPG အသီး(၂)လုံး၊ ကျည်ဘောက်အပို(၂၈)ခု၊ စကားပြောစက် ဆက်သွယ်ရေးအထိုင်စက်တွေအပါအဝင် အခြားစစ်ဘက်ဆိုင်ရာ ဆက်စပ်ပစ္စည်းများကို သိမ်းဆည်းရမိခဲ့သည်ဟု နဂါးနီစစ်ကြောင်းမှထုတ်ပြန်ထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)