ရှမ်းပြည်နယ်မြောက်ပိုင်း မန်တုံမြို့နယ်တွင် ကချင်လွတ်လပ်ရေးတပ်မတော် (KIA)နှင့် စစ်ကောင်စီတပ်တို့ တိုက်ပွဲဖြစ်ပွားခဲ့ကြောင်း KIA သတင်းနှင့် ပြန်ကြားရေးဌာန တာဝန်ခံ ဗိုလ်မှူးကြီးနော်ဘူကပြောသည်။
KIA တပ်ရှိရာသို့ စစ်ကောင်စီတပ်က ထိုးစစ်ဆင်လာ၍ ခုခံတိုက်ပွဲဖြစ်ပွားခဲ့ပြီး မန်တုံရှိ စစ်ကောင်စီတပ်စခန်းကို KIAက အောက်တိုဘာ ၁၇ရက်တွင် ပြန်လည်တိုက်ခိုက်ခဲ့ခြင်းဖြစ်သည်ဟုဆိုသည်။
“KIAတပ်ရင်း (၃၄)ဘက်မှာ စစ်ကောင်စီဘက်က ထိုးလာလို့ကျွန်တော်တို့ ခုခံတိုက်ပွဲဖြစ်တာရှိပါတယ်။ နောက်မန်တုံဘက်မှာလည်း ကျွန်တော်တို့ဘက်က ပြန်ပစ်တဲ့ဟာလည်းရှိပါတယ်။ ဒါပေမဲ့ အသေးစိတ်ကတော့ စုံစမ်းနေဆဲဖြစ်ပါတယ်”ဟု ဗိုလ်မှူးကြီးနော်ဘူက People’s Spring သို့ပြောသည်။
တိုက်ပွဲ၌ အထိအခိုက်အကျအဆုံး သတင်းများ မကြားရသေးကြောင်း ၎င်းကဆက်ပြောသည်။
ရှမ်းမြောက်ဒေသ စစ်ရေးသတင်းများ ဖော်ပြလေ့ရှိသည့် 7Stars News စာမျက်နှာတွင် မန်တုံတိုက်ပွဲ၌စစ်ကောင်စီတပ်မှ သေဆုံးထိခိုက်များခဲ့ကြောင်း ဖော်ပြထားသည်။
မန်တုံမြို့နယ် အူမန်ကျေးရွာ အနီးရှိ KIA ရှေ့တန်းတပ်စခန်းကို စစ်ကောင်စီတပ်က အင်အားအလုံးအရင်း ထိုးစစ်ဆင်လာ၍ အောက်တိုဘာ ၁၇ရက် နံနက်မှစ၍ တိုက်ပွဲပြင်းထန်ခဲ့ရာ စစ်ကောင်စီတပ်က အထိနာခဲ့ပြီး ထိခိုက်ကျဆုံးသူများကို ကားဖြင့် သယ်ယူခဲ့ကြောင်း မြေပြင် သတင်းရင်းမြစ်ကို ကိုးကား ဖော်ပြထားသည်။
KIAနှင့်အတူ ပြည်သူ့ကာကွယ်ရေးတပ်(PDF) ရဲဘော်များ ပူးပေါင်းတိုက်ခိုက်ခဲ့ခြင်းဖြစ်သည်ဟုသိရသည်။
KIA တပ်စခန်းကို ထိုးစစ်ဆင်လာ၍ မန်တုံအခြေစိုက် ခလရ(၁၃၀)တပ်အား KIA/PDF ပူးပေါင်းအဖွဲ့က ဝင်ရောက်ပစ်ခတ်ခဲ့ရာ စစ်ကောင်စီတပ်က လက်နက်ကြီးဖြင့် ရမ်းသမ်းပစ်ခတ်၍ ခရစ်ယာန်ဘာသာရေးဆရာတစ်ဦး ဒဏ်ရာရခဲ့သည်ဟု ဆိုသည်။
KIA/PDF ပူးပေါင်းတပ်သည် စက်တင်ဘာလကုန်ပိုင်းကလည်း ခလရ(၁၃၀) တပ်နှင့် မန်တုံရဲစခန်းကို တိုက်ခိုက်ခဲ့ရာ မန်တုံရဲစခန်းကို မီးရှို့ခဲ့သည်။ ထို့ပြင် မန်တုံမြို့နယ် ထွေအုပ်ရုံးကိုလည်း မီးရှို့ခဲ့ကြောင်း ဖော်ပြထားသည်။
