စစ်ကိုင်းတိုင်း ဗန်းမောက်မြို့နယ် မံယူးကြီးကျေးရွာနှင့် ကြောင်လည်ကျေးရွာမှ ဆေးရုံများကို စစ်ကောင်စီတပ်က လေကြောင်းတိုက်ခိုက်မှုပြုလုပ်ခဲ့၍ အရပ်သားပြည်သူများ သေဆုံးထိခိုက်ရှိခဲ့သည်ဟု ဒေသခံသတင်းရင်းမြစ်က ပြောသည်။
အောက်တိုဘာ ၂၀ရက် ညနေပိုင်း၌ မံယူးကြီးကျေးရွာရှိ ကိုယ်ထူကိုယ်ထ ဆေးရုံကို စစ်ကောင်စီတပ်က လေကြောင်း တိုက်ခိုက်ခဲ့၍ အမျိုးသမီး တစ်ဦးသေဆုံးပြီး ဒဏ်ရာရသူ ၅ဦးထက်မနည်းရှိသည်ဟု ဒေသခံက ပြောသည်။ အလားတူ ယနေ့ (အောက်တိုဘာ ၂၁ရက်) နေ့လည်ပိုင်း ၌လည်း စစ်ကောင်စီတပ်က မံယူးကြီးရွာနှင့် ၁၅မိုင်ခန့်အကွာရှိ ကြောင်လည်ရွာကို လေကြောင်း တိုက်ခိုက်ခဲ့ရာ အဆောက်အဦ ထိခိုက်မှုရှိခဲ့သည်ဟု ဒေသခံက ပြောသည်။
အဆိုပါ ဖြစ်စဉ်များနှင့်ပတ်သက်၍ အမျိုးသားညီညွတ်ရေးအစိုးရ သတင်းပြန်ကြားရေးဌာန PVTV ကလည်း ဖော်ပြခဲ့ရာ မံယူးကြီးရွာနှင့် ကြောင်လည်ရွာ လေကြောင်း တိုက်ခိုက်ခံရမှုအတွင်း အရပ်သားပြည်သူနှစ်ဦး သေဆုံးပြီး ၁၂ဦး ဒဏ်ရာရှိခဲ့သည်ဟု ဆိုသည်။
” မံယူးကြီးကျေးရွာမှာ ဖွင့်ထားတဲ့ ကိုယ့်အား ကိုယ်ကိုး ပြည်သူ့တိုက်နယ်ဆေးရုံးကို မနေ့က ဖိုက် တာဂျက် နှစ်စီးနဲ့လာပစ်သွားတယ်ဗျ။ ဆေးရုံအကုန်လုံး စုတ်ပြတ်သတ်သွားတယ်။ အဲဒီအပြင် မှာ ဆေးရုံးပြင်ဆင်ရေးက မပြီးသေးတော့ ကြွေပြားကပ်တဲ့ လုပ်ငန်းလုပ်နေတာ ရွာက လုပ်အားပေးနေတဲ့ အမျိုးသမီးတစ်ယောက် ပွဲချင်းပြီး ဆုံးသွားတယ်။ နောက်ထပ်ရွာသား ၅ယောက် အသေးစား ဒဏ်ရာတွေရတယ်”ဟု ဒေသခံ သတင်းရင်းမြစ်တစ်ဦးက ပြောကြားထားကြောင်း PVTVက ဖော်ပြသည်။
ထိုသို့ လေကြောင်း တိုက်ခိုက်မှုကြောင့် အသက် ၄၅နှစ်အရွယ်ရှိ ဒေါ်ခင်မာချို သေဆုံးခဲ့ပြီး အသက် ၇၃နှစ်အရွယ် ဦးမောင်သန်း၊ အသက် ၅၀ အရွယ် ဒေါ်စိန်မြနှင့် အသက် (၃၅)နှစ်အရွယ် ကိုလွင်မိုးတို့ ဒဏ်ရာရခဲ့သည်ဟုဆိုသည်။ ထို့ပြင် ဒဏ်ရာရသူများတွင် ကလေးငယ်များ ပါသည်ဟု သတင်းရရှိပြီး ဆက်လက် စုံစမ်းနေကြောင်းလည်း ဖော်ပြထားသည်။
ထို့အပြင် ကြောင်လည်ရွာ လေကြောင်းတိုက်ခိုက် ခံရမှု ဖြစ်စဉ်တွင်လည်း ပြည်သူ တစ်ဦးသေဆုံးပြီး ခုနစ်ဦး ဒဏ်ရာရခဲ့ကြောင်း ဖော်ပြထား သည်။ ထို့ပြင် ဆေးရုံခန်းမ၊ ပညာရေးဝန်ထမ်းအိမ်ယာနှင့် နေအိမ်အချို့ မီးလောင်ပျက်စီးခဲ့သည်ဟု ဆိုသည်။
ဗန်းမောက်မြို့နယ်အတွင်း ဒေသခံပြည်သူ့ကာကွယ်ရေးတပ်များနှင့် စစ်ကောင်စီတပ်တို့ တိုက်ပွဲဖြစ်ခဲ့သော်လည်း ယခု လေကြောင်း တိုက်ခိုက်ခံရသည့် မံယူးကြီးရွာနှင့် ကြောင်လည်ရွာတို့၌ တိုက်ပွဲဖြစ်ပွားမှုမရှိဘဲ တိုက်ခိုက်လာခြင်း ဖြစ်ကြောင်း ဒေသခံက ပြောသည်။
