ကြာအင်းဆိပ်ကြီးမြို့နယ်ရှိ စစ်တပ်လက်အောက်ခံ ကျိုက်ဒုံနယ်မြေရဲစခန်းကို KNLA ပူးပေါင်းတပ်ဖွဲ့က ဝင်ရောက်စီးနင်းတိုက်ခိုက်ခဲ့ပြီး လက်နက်ခဲယမ်းများစွာ သိမ်းဆည်းရခဲ့သည်ဟု ဒေါနစစ်ကြောင်းက သတင်းထုတ်ပြန်ထားသည်။
အောက်တိုဘာလ(၂၈)ရက် ည(၉)နာရီခွဲအချိန်တွင် ကရင်အမျိုးသားလွတ်မြောက်ရေးတပ်မတော်(KNLA) နှင့် ဒေါနစစ်ကြောင်း တပ်ခွဲ(၁)ပူပေါင်းအဖွဲ့က ဝင်ရောက်စီးနင်းတိုက်ခိုက်ခဲ့ပြီး တိုက်ပွဲကြာချိန်(၁၀)မိနစ်ခန့်ရှိခဲ့ကာ သေနတ်(၁၃)လက်၊ မိုင်း၊ စိန်ပြောင်း၊ ဆက်သွယ်ရေးစက်၊ လက်ပစ်ဗုံး၊ ဗုံးသီးနှင့် ကျည်ဆံများစသော လက်နက်ခဲယမ်းများအား သိမ်းဆည်းရခဲ့သည်။
တိုက်ပွဲအတွင်း KNLA ပူးပေါင်းတပ်ဖွဲ့များဘက်မှ ထိခိုက်ကျဆုံးမှုတစ်စုံတစ်ရာမရှိဘဲ စစ်ကောင်စီတပ်၏ ထိခိုက်သေဆုံးမှုအား အတည်ပြုနိုင်ရန် စုံစမ်းနေဆဲဖြစ်ပြီး ဆက်လက်ဖော်ပြပေးသွားမည်ဖြစ်ကြောင်း ထုတ်ပြန်ချက်တွင်ပါရှိသည်။
ယခုတိုက်ခိုက်မှုသည် KIO/KIA နယ်မြေ အနန့်ပါဖြစ်စဉ်နှင့်တကွ နိုင်ငံတဝန်းတွင် စစ်ကောင်စီတပ်၏ တရားမဲ့လုပ်ရပ်များအပေါ် တုံ့ပြန်သောတိုက်ခိုက်မှုတစ်ခုဖြစ်သည်ဟု ဒေါနစစ်ကြောင်းမှ ဆိုသည်။
